DILI, 11 fevereiru 2020 (TATOLI) – Sekretáriu Estadu Formasaun Profisionál no Empregu (SEFOPE) kontinua haruka traballadór timoroan hamutuk 62 bá serbisu iha Austrália iha semana ne’e.
Ne’ebé mak nain-30 sei bá uluk iha loron 13, nain-14 sei tuir iha loron tuirmai no na’in-18 sei bá tan iha loron 16, ne’ebé kompostu husi mane 46 no feto 16, ne’ebé bá serbisu liuhosi programa serbisu sazonál iha área ortikultura nian tanba hetan ona kontaktu hosi Kompañia Sundrop.
Diretór Jerál Empregu Esteriór, Paulo Alves, husu ba traballadór sira atu hatudu serbisu di’ak, nune’e ajénsia sira bele fó konfiansa, bele loke oportunidade ba timoroan sira seluk ne’ebé iha vontade atu bá serbisu.
Notísia relevante : Semana ne’e, Timoroan 103 Arranka Bá Austrália
“Hatudu imi-nian serbisu di’ak, hodi empreza sira iha Austrália bele depozita konfiansa ba Timor-Leste atu kontinua kontrata timoroan sira ne’ebé iha ona lista work ready full”, Paulo Alves afirma iha ámbitu despede ho traballadór sira, iha Senai Becora, ohin.
Nia mós husu traballadór na’in-62, atu rai osan didi’ak bainhira fila mai Timor-Leste bele sustenta ekonomia família nian, nune’e mós bele kria empregu rasik. “Ha’u lakohi imi estraga osan ne’ebé imi hetan iha ne’ebá”, nia akresenta.
Iha fatin hanesan, traballadór Almérico da Silva, sente orgullu tanba foin hetan oportunidade ba serbisu iha Austrália no promete sei uza oportunidade ho di’ak.
“Ha’u sei aproveita oportunidade hodi esforsu an serbisu ho di’ak, nune’e bele ajuda ekonomia família nia”, katak.
Entretantu, iha serimónia despedida ho traballadór sira, rezulta asina deklarasaun entre traballadór sira ho SEFOPE, nune’e bele regularize sira atu foku serbisu durante fulan-neen iha ne’ebá.
Antes ne’e, Diretór Nasionál Empregu Esteriór (DNEE), Sekretáriu Estadu Formasaun Profisionál no Empregu (SEFOPE, sigla-portugés), Filomeno Soares, informa tuir planu, SEFOPE sei haruka timoroan ho mínimu 5000 no másimu 10.000 bá serbisu iha Austrália.
Timoroan hirak ne’e sei bá liuhosi programa serbisu sazonál (SWP, sigla inglés) no pacific labour scheme (PLS) ho númeru timoroan ne’ebé barak tanba empreza hosi Austrália hatama pedidu barak ba SEFOPE.
Notísia relevante : 2020, SEFOPE Planeia Haruka Timoroan 10.000 Bá Serbisu iha Austrália
Jornalista : Natalino Costa
Editora : Maria Auxiliadora
