DILI, 14 fevereiru 2020 (TATOLI)–Serbisu Autónomu Medikamentu Ekipamentu Saúde (SAMES), ohin, hala’o Workshop ho tema “Prepasaraun Ba Tinan Lima ho Planu Estratéjiku 2020-2024”.
“Tinan barak ona husi SAMES seidauk prepara planu estartéjiku ida. Entaun, esbosu iha ona no agora daudaun ami iha oprtunidade atu lori planu ne’e hodi diskute hamutuk ho diretór munisípiu, husi ospitál nomós ajénsia sira hodi ami bele tau hamutuk ideia ida bele kompleta ba planu estartejiku ida ne’e,” dehan Diretora SAMES, Odete Maria Freitas, ba jornalista sira hafoin ramata workshop iha Timor Plaza, ohin.
Nia hatutan, ba oin sei deskute razaun no sirkunstansia hodi deskute esbosu ida ne’e ba oin. Agora, nia dehan, prepara hela dokumentu ho informasaun sira hodi bele ajuda identifika forsa, frakeza, no ameasa ne’ebé iha hodi bele dezenvolve.
Iha ne’e, nia esplika, sei fó importánsia ba importasaun armazenamentu no ba distribuisaun aimoruk kosumiveis, ekipamentu médiku no reajentes sira.
“Laiha rasaun forti ida mai ami atu dehan agora esbosu ne’ebé mak iha hodi husu ita hotu nia opiniaun hodi bele hetan razaun sira ne’e,” nia dehan.
Tanba, nia haktuir, iha serbisu lubuk ida mak SAMES konsege realiza nomós iha mudansa signifikativu liuhusi pesoál SAMES nian iha área boa-governasaun, aproviziomentu, lojistika, administrasaun inklui mós serbisu apoiu husi finansa no rekursu umanus.
“Buat sira ne’e mak presiza hadi’a liuhusi dalan ne’ebé mak diak,” nia hatten.
Iha fatin hanesan, Diretora Jerál Prestasaun Saúde Odete da silva Viegas hateten apresia ba serbisu SAMES nian ne’ebé mak daudaun ne’e iha insisiativa di’ak atu halo planu estratéjiku rasik ba tinan lima nian.
“Planu estartéjiku tinan 2011-2030 ne’ebé mak atu asegura prestasaun serbisu ba ita-nia komunidade sira no bele kobre ba ita-nia populasaun Timor laran tomak,” nia dehan.
Nia haktuir, SAMES nia papel importante ida mak oinsá mak bele asegura fornesimentu aimoruk no mós distribuisaun aimoruk sira ba to’o iha postu de saúde sira, hodi nune’e komunidade sira bele hetan kontinua asesu ba saúde nomós tratamentu.
“Tanba, papel SAMES mós garantia aimoruk iha rai laran, oinsá ita bele regula aimoruk sira ne’ebé mak iha hodi distribui iha teritóoriu Timor laran tomak,” nia esplika.
Jornalista : Felicidade Ximenes
Editór : Rafy Belo
