DILI, 17 fevereiru 2020 (TATOLI) – Médiku Nova Zelándia autoriza ona bolseiru timoroan na’in-17 atu sai husi Barraka Militár Whangaparaoa iha 19 fevereiru tanba laiha sintoma Coronavirus.
Bolseiru timoroan sira ne’ebé isoladu, ho autorizasaun husi Governu Nova Zelándia, evakua husi sidade Wuhan, Provínsia Hubei, Repúblika Populár Xina ba Aucland, Nova Zelándia iha loron 5 fevereiru atu halo observasaun durante semana rua nia laran molok ba Timor-Leste.
“Dadaun, ami nia kondisaun di’ak hotu, tanba ne’e ami simu informasaun pozitivu katak iha loron 19 fevereiru ami sai ona husi Barraka Militár ne’e”, dehan bolseiru Nicodino da Cruz ba Agência TATOLI liuhosi rede sosiál, segunda ne’e.
Notísia Relevante: Ohin, Estudante Na’in 17 Evakua Ona Husi Sidade Wuhan
Nia informa, sai ona husi fatin observasaun tanba kompleta ona loron izolamentu, ne’ebé halo ona kontrola médiku durante loron 14 nian.
Bolseiru husi Munisípiu Lautém ne’e salienta, hafoin sai husi Barraka Militár ne’e, bolseiru timoroan sira sei ba sidade Auckland hodi hasoru Ministru Negósiu Estanjeiru no Kooperasaun, Dionísio da Costa Babo Soares.
“Data loos atu ami fila ba Timor-Leste ne’e seidauk hatene, tanba ita nia ministru mós iha ne’e atu hato’o agradesementu direita ba Governu Nova Zelándia, maka foin ami ba Timór”, nia akresenta.
Ho nune’e, Nicodino da Cruz dehan, Ministru Dionísio lori Timor-Leste nia naran sei hato’o agradesementu ba Governu Nova Zelándia hafoin akompaña bolseiru na’in-17 fila mai Timor-Leste.
“Ami sei ba hamutuk ho Ministru Dionísio Babo husi Bali mak foin ba Timór. Ne’ebé ami hein de’it atu fila”, nia subliña.
Notísia Relevante: Kondisaun Di’ak Hotu, Médiku Autoriza Bolseiru 17 Bele La’o Sai
Nia realsa tan, iha loron kuarta (19/02), médiku sira sei fó karta ba bolseiru sira katak livre husi sintoma Coronavirus atu bele fasilita timoroan sira-ne’e bainhira halo viajen ba Timor-Leste.
“Bainhira ami sai husi ne’e (Barraka Militár), médiku sira sei hakerek karta liuhosi rezultadu kontrolu médiku ba ami katak ami moos husi sitoma Coronavirus atu bele hetan autorizasaun husi aeroportu ne’ebé ami sei liu”, bolseiru ne’e esplika.
Antes ne’e, iha loron 15 fevereiru, Ministru Dionísio dezloka ona ba Nova Zelándia reprezenta Governu Timor-Leste, fó agradesimentu ba Governu Nova Zelándia ne’ebé fó ona apoiu hodi evakua estudante timoroan sira iha sidade Wuhan.
Entretantu, Prezidente Repúblika, Francisco Guterres Lú Olo, lori Estadu Timor-Leste nia naran, haruka ona karta ba Governadór Jerál Nova Zelándia, Patsy Reddy, hodi agradese ba Estadu Nova Zelándia nia jestu solidariedade hodi fó apoiu ba estudante timoroan sira.
Jornalista: Florencio Miranda Ximenes
Editora: Julia Chatarina
