DILI, 17 fevereiru 2020 (TATOLI) – Diretór Jerál Turizmu, Ministériu Turizmu, Komérsiu no Indústria (MTKI), José Filipe Dias Quintas, informa, aban (18/02) ró kruzeiru Coral Adventure ho totál pasajeiru hamutuk na’in-85 mai vizita Timor-Leste.
Totál pasajeiru ho ró klasifikasaun luxu ne’e, kompostu husi turista na’in-49 no tripulante na’in-36, ne’ebé maioria hanesan sidadaun Austrália.
“Hakarak hato’o ba públiku katak aban, ita hetan vizita ró kruzeiru ho katégoria luxu ka ró ema riku-nian, durante kuaze oras neen nia laran iha Timor-Leste”, tenik Diretór José Filipe liuhosi konferénsia impresa iha Sentru Konvesaun Dili (CCD-sigla portugés), segunda ne’e.
Notísia Relevante: Aban, Turista 2.072 Vizita Timor-Leste ho Kruzeiru Pacific Explorer
Ró Kruzeiru ne’e sei to’o iha Timor-Leste no sei atraka iha Portu Dili tuku 12:00 meiu dia no fila ba Austrália tuku 18:00.
Kona-ba transporte ba turista sira, Ajénsia SHIPPING LAI – ARA mak sei toma konta.
“Ita hotu-hotu presiza kontribui ba pás no estabilidade atu iha vizita turista sira-ne’e, hodi hatudu imajen Timor-Leste ba mundu no bele hetan benefísiu ekonómiku”, nia akresenta.
Haree ba vizita ró kruzeiru iha fulan-ne’e nia laran, nia observa Timor-Leste sai ona hanesan distinasaun sítiu turístika ida seguru no hakmatek.
“Tinan 2020 foin iha fulan-fevereiru de’it, maibé ró kruzeiru rua mai vizita ona Timor-Leste hodi fó benefísiu ekonómiku no promove ita-nia imajen ba mundu”,dehan nia.
Iha fatin hanesan, Diretór Mega Tour, Cosme Sanches, haktuir ajénsia hahú prepera ona karreta atu turista sira bainhira tun husi ró, bele tula ba vizita sítiu turístika sira ne’ebé besik iha kapitál Dili.
“Ami sei transporta sira (turista) ba vizita ita-nia sitíu turistíka hanesan Cristu Rei, Semitériu Santa Cruz, Muzeu Rezisténsia, Sentru Nasionál Chega (CNC-sigla portugés) no merkadu tais iha Colmera”, nia realsa.
Nune’e mós, dirijente ne’e dehan, sei iha Ofisiál Médiku husi Ministériu Saúde ne’ebé koloka iha Portu Dili, hamutuk ho Cruz Vermella Timor-Leste (CVTL) hodi halo vizilánsia no observasaun ba turista sira atu prevene Coronavirus.
Ró kruzeiru sei atraka iha portu re-alokasaun foun, ne’ebé foin inaugura husi Governu Timor-Leste no Japaun.
Antes ne’e, iha loron 5 fevereiru, turista hamutuk na’in-2945 mai vizita Timor-Leste ho Ró Pacific Explore durante oras ualu nia laran.
Ba atividade ida ne’e, MTKI sei servisu hamutuk Imigrasaun, PNTL, APORTIL, Diresaun Nasionál Transporte Martima (DNTM), Kuarentena no Bio Seguransa, Munisípiu Dili, CVTL, Ministériu Saúde, Muzeu Rezisténsia, CNC no Parseiru Dezenvolvimentu sira hanesan Market Fasility, Turizmu ba ema hotu husi USAID no setór privadu ne’ebé maka toma konta ba pakote viajen terrestre hanesan Ajensia Operadór Mega Tour.
Ró kruzeiru ne’e konstrui iha tinan 2018 iha Nasaun Norwega hanesan kategoria Luxu no foin mak halo operasaun iha tinan 2019 nia laran.
Operadór ba ró ne’e husi Coral Expeditions Austrália ho destinasaun haleu Austrália, illa Pasífiku no Indonésia.
Kruzeiru ne’e iha fasilidade hanesan restaurante ho coziña nakloke ho kuartu hamutuk 60 ho nia varanda, Pisina, salaun, fatin jinástiku no seluk tan.
Enkuantu medida ró ne’e ho metru 306/93 no Luan metru 17/56, ho Kapasidade bele tula pasajeiru hamutuk na’in-120.
Jornalista: Florencio Miranda Ximenes
Editora: Julia Chatarina
