DILI, 18 fevereiru 2020 (TATOLI) – Prezidente Komisaun Funsaun Públika (KFP), Faustino Cardoso, rekoñese durante ne’e avaliasaun dezempeñu ba Funsionáriu Públiku sira bazeia de’it ba pontualidade serbisu no lealdade, maibé haree filafali ba rezultadu serbisu laiha.
Ho hanoin ida ne’e mak KFP aprezenta proposta alterasaun ba Primeiru-Ministru, Taur Matan Ruak, hodi hetan orientasaun di’ak liután no bele aselera lejizlasaun ne’e.
“Ami mai aprezenta proposta alterasaun Dekretu-Lei kona-ba Avaliasaun Dezempeñu, tanba durante ne’e Avaliasaun Dezempeñu iha Funsaun Públika bazeia de’it ba fatór sia no la haree kona-ba saida mak halo ona? rezultadu alkansa iha serbisu mak saida? Kontribuisaun alkansa nia objetivu ba instituisaun to’o iha ne’ebé?”, informa Faustino hafoin hasoru malu ho Xefe Governu iha Palásiu Governu, tersa ne’e.
Nia subliña, tanba ne’e proposta alterasaun ne’ebé aprezenta hodi kontempla situasaun hirak ne’e, nune’e bainhira halo avaliasaun dezempeñu iha sasukat ne’ebé klaru.
“Ita buka hadi’a dekretu-lei ida uluk tanba fó liu enfaze ba rezultadu serbisu no tempu hanesan haree oinsá kontribuisaun serbisu funsionáriu idaidak iha atu alkansamentu objetivu instituisaun ninian. Durante ne’e, iha lejizlasaun ne’e haree liu ba funsionáriu ida mai tuir oras ka lae? lealdade oinsá no serbisu ekipa oinsá? maibé rezultadu serbisu laiha. Tanba ne’e ba-oin presiza haree rezultadu no kontribuisaun alkansamentu objetivu instituisaun iha ka lae”, Prezidente KFP realsa.
Biban ne’e, Prezidente KFP no ninia ekipa aprezenta mós proposta Dekretu-Governu kona-ba regra, regulamentu, no sistema kontrolu intermu iha Funsaun Públika.
“Ita iha ona Inspetór Jerál Estadu no Inspetór nível Ministériu, ne’ebé durante ne’e KFP halo enkontru regulár iha kada fulan-tolu hodi ikus mai hamosu rezultadu serbisu hamutuk ida”, nia dehan tan.
Faustino mós observa, durante ne’e funsionáriu idaidak tuir formasaun iha rai-li’ur maibé bainhira ramata ona, la’o ketak-ketak no laiha uniformidade. Tanba ne’e, proposta Dekretu Governu ida-ne’e atu iha mekanizmu uniforme serbisu entre inspetór sira.
Nune’e mós, ekipa ne’e atualiza informasaun kona-ba promosaun Funsionáriu Públiku sira.
“Ami atualiza prosesu promosaun ba Funsionáriu sira iha tinan-2019 nian konklui tiha ona. Ema hamutuk 1.354 maka promovidu tuir grau idaidak ninian no iha tinan ida-ne’e, KFP halo ona preparasaun atu avansa ba promosaun tuir mai. Tanba ne’e, maka ami aprezenta fali proposta Rezolusaun Governu atu determina kona-ba númeru ba vaga iha 2020.
Nia informa mós kona-ba prosesu selesaun pur méritu ba kargu diresaun no xefia ba Funsaun Públika to’o ohin loron husi 1.900 kargu, porsentu 25 mak foin halo selesaun no porsentu 75 seidauk.
Nune’e, nia haktuir enkontru ohin, PM Taur fó apoia tomak ba servisu KFP nian no fó orientasaun téknika hodi aselera prosesu sira ne’e.
“Ami atualiza situasaun sira ne’e ba Primeiru-Ministru hodi fó apoia tomak. Fó ona orientasaun ba pesoál tékniku sira atu aselera prosesu to’o iha Konsellu Ministru. Klaru katak Xefi Governu enkoraza mós atu tékniku sira bele halo komunikasaun di’ak liu hodi bele viabiliza prosesu ne’e ho lalais tanba Primeiru-Ministru hatudu vontade boot atu aselera no hetan rezultadu ruma husi VIII Governu’, nia salienta.
Jornalista: Antónia Gusmão
Editora: Julia Chatarina
