DILI, 18 fevereiru 2020 (TATOLI)—Prezidente Komisaun Funsaun Públika (KFP), Faustino Cardoso, ohin, atribui sertifikadu ba pesoál 129 ne’ebé durante ne’e ajuda KFP ba prosesu promosaun grau ba funsionáriu sira.
Ema-na’in 129 ne’e kompostu hosi estudante Universidade Nasionál Timor Lorosa’e (UNTL) no Institutu Of Business (IOB) hamutuk 49, membru painel juri na’in 42 no elaboradór testu na’in 38.
Hosi apoiu ne’e, funsionáriu 1.354 mak promovidu dezde janeiru 2020. “Prosesu promosaun ne’e involve ministériu hotu-hotu no mós instituisaun públika hotu iha Timor laran”, katak Faustino Cardoso ba TATOLI iha salaun Ministériu Solidaridade Sosiál no Inkluzaun (MSSI), Kaikoli, ohin.
Nia hatutan: “Inísiu ema na’in 10.455 kandidatu elijivel, depois ta’is hela ema na’in 9.354 mak tuir promosaun, rezultadu ikus ema na’in 1.354 mak promovidu dezde janeiru 2020″.
Faustino Cardoso haktuir promosaun ne’e KFP organiza enkontru ho ekipa juri, ekipa téknika no ekipa elaborasaun ba pergunta no resposta ba prosesu promosaun grau nian ne’ebé hala’o iha agostu to’o outubru 2019.
“Prosesu hotu konklui ona no nia rezultadu mak funsionáriu públiku hamutuk na’in 1.354 mak promovidu tuir grau ida-idak ninian husi kiik sa’e ba boot”, tenik.
Nia rekoñese prosesu ne’e la’o ho difikuldade, tanba prosesu foun no dahuluk iha istória KFP ninian, ne’ebé liuhosi eventu ida halo evaluasaun hodi rona feadback (efeitu) nune’e bele hadi’a ba oin.
“Prosesu la’o ho kapáz no rezultadu di’ak maibé kompromisu buka hadi’a prosesu, asegura di’ak liután prosesu dezenvolvimentu kareira profesionál funsionáriu públiku ninian, liuliu sira ne’ebé mak prenxe rekezitu mínimu tinan haat iha funsaun ida-idak ninian”, hatutan.
Prezidente KFK afirma bainhira promovidu ona entaun aumenta sira-nia grau no saláriu ne’ebé koresponde ho grau ida-idak ninian.
Nia dehan komisaun nia kompromisu molok mandatu ramata, sei halo tan prosesu promosaun daruak iha tinan ne’e.
Notísia Relevante: KFP fó Pose ba Kargu Xefia Na’in Haat
Jornalista : Osória Marques
Editór : Cancio Ximenes
