DILI, 21 fevereiru 2020 (TATOLI) – Diretór Nasionál Estrada, Ponte no Kontrolu Cheia (DNEPCC-sigla portugés), João Mario Gama de Saousa, informa progresu estrada rurál ho pakote 48 ne’ebé Ministériu Obra Públika (MOP) asina ona kontratu ho kontraktór sira, maioria atinje ona porsentu 25 ba letan.
Iha tinan-2019, MOP asina ona kontratu ho kontraktór 48, hodi konstrui estrada rurál ho pakote 48 iha munisípiu 12, la inklui Rejiaun Administrativu Espesiál Oé-Cusse Ambeno (RAEOA).
“Kona-ba pakote estrada, ami obsreva projetu la’o daudaun no projetu sira-ne’e kuaze maioria atinje porsentu 25 ba leten ne’ebé ita kontinua monitoriza to’o porsentu 100”, tenik Diretór João ba Agência TATOLI iha knaar fatin, Rai-Kotu, Comoro, sesta ne’e.
Nune’e, dirijente ne’e afirma tan projetu estrada rurál hirak ne’e hetan asisténsia téknika husi International Labour Organization (ILO) ho kustu orsamentu liuhosi liña ministeriál hamutuk millaun $15.
Nia dehan, ekipa ne’ebé halo supervizaun mak enjeñeiru na’in-50 hamutuk ho ekipa ILO atu kontrola konstrusaun pakote 48 iha munisípiu 12.
“Ita nia planu projetu estrada rurál ne’e sei finaliza iha tinan ne’e (2020), maibé depende ba obstáklu no risku ne’ebé bele estende tinan ida tan no depende ba razaun tékniku ne’ebé empreza sira aprezenta,” nia akresenta.
Diretór João afirma liután, parte MOP liuhosi apoia ILO sei garante kualidade projetu ne’ebé hala’o iha munisípiu 12, la inklui RAEOA.
Kona-ba tipu projetu sira, nia dehan konstrusaun ne’e uza alkatraun no haree ba kondisaun área bele mós uza simentu atu karreta sira bele halo movimentasaun ho di’ak.
“Ita fó treinamentu ba ekipa tékniku kontraktór sira husi Diresaun Estrada Rurál ba Dezenvolvimentu atubele konstrui estrada ho kualidade”, nia adianta.
Diretór Nasionál ne’e dehan tan, dadaun ne’e nakloke ba empreza sira atu halo prosesu pagamentu balun no prontu atu fasilita hodi ajuda halais konstrusaun.
Projetu 48 ne’e, liuhosi konkursu públiku husi Komisaun Nasionál Aprovizionamentu (CNA-sigla portugés) ne’ebé rigorozu, liuliu haree ba kapasidade téknika kada kompañia nian.
Estrada rurál ho pakote 48 fahe ba kategoria tolu hanesan reabilitasaun ho kilometru 12,05, manutensaun Periódika ho kilometru 215,70 no manutesaun rutina ho kilometru 300,10, nune’e totál hamutuk kilometru 527,85.
Governu Asina Kontratu ho Kontratór
Iha loron 2 agostu 2019, Ministru Obra Públika, Salvadór Eugenio dos Reis Pires asina kontratu ho kontraktór 48 no husu atu konstrui no reabilita estrada rurál ho kualidade hodi bele kontribui ba prosesu dezenvolvimentu nasionál.
“Laiha kualidade ita la selu, Governu só halo pagamentu bainhira ekipa tékniku halo supervizaun katak obra iha kualidade”, Ministru fó hanoin.
Ministru Salvador akresenta, VIII Governu liuhosi liña ministeriál iha 2019 prevee ona millaun $15-resin ba estrada rurál ho pakote 48 no ba faze daruak pakote 18 liuhosi orsamentu fundu infrastrutura.
Vizaun VIII Governu, atu hametin konetividade infrastrutura fízika entre área rurál ho postu administrativu no munisípiu inklui nasionál atu garante povu bele asesu estrada.
Iha 2019, Governu Timor-Leste asina ona ho parseiru dezenvolvimentu liuhosi Governu Austrália atu apoiu millaun AU$25 atu finansia asisténsia téknika liuhusi ILO.
Governu Timor-Leste kompromete kada tinan sei tau orsamentu millaun $21 atu konstrui estrada rurál iha territóriu Timor-Leste hodi atinje trajetu ne’ebé kada tinan atinje kilómetru kuaze 400 to’o 500.
Jornalista: Florencio Miranda Ximenes
Editora: Julia Chatarina
