DILI 24 fevereiru 2020 (TATOLI) – Primeiru-Ministru (PM), Taur Matan Ruak asina ona Plaka ba Inaugurasaun Sistema Kanalizasaun ba Bee-Moos ne’ebé lokaliza iha Postu Administrativu Baguia, Munisípiu Baucau, no antes ne’e lansa ona iha 2019.
Seremónia asina plaka ne’e hala’o iha PM Taur ninia knaar fatin, Palásiu Governu, no plaka ne’e rasik lori husi Diretór Ezekutivu Organizasaun Naun Govermentál (ONG), Alfa Star, Albertino Fransa.
“Ha’u mai hasoru Primeiru-Ministru atu asina plaka ba projetu ida-ne’ebé ami halo iha Postu Administrativu Baguia, Munisípiu Baucau. Projetu ne’e besik iha Primeiru-Ministru ninia uma, iha Aideia Waiboro ho Waibitae, Suku Haikoni”, tenik Jerente Alfa Star iha Palásiu Governu, segunda ne’e.
Nia haktuir, projetu sistema kanalizasaun bee-moos finaliza ona iha 2018, maibé momentu ne’ebá bainhira konvida Xefe Governu atu halo inaugurasaun no asina plaka, nia parte okupadu. Tanba ne’e ohin mak lori plaka hodi PM bele asina.
Jerente ne’e subliña, projetu ne’e hala’o hosi ONG Alfa Star no suporta hosi Embaixada Japaun, katak osan ne’e mai hosi povu Japaun ba povu Timor-Leste ho montante $89.000
Nia relata, benefisiáriu ba sistema bee-moos ne’e mai hosi aldeia rua (Waiboro no Waibitae) hamutuk uma-kain 80-resin.
Sistema bee-moos ne’e to’o agora komunidade sira sei utiliza ba nesesidade loron-loron nian, tanba ne’e PM Taur apresia ho inisiativa ida ne’e.
“Primeiru-Ministru agradese no obrigadu ba komunidade Japaun tanba bele apoia ona komunidade Timor-Leste, liuliu iha área rurál”, nia akresenta.
Jornalista: Antónia Gusmão
Editora: Julia Chatarina
