DILI, 04 marsu 2020 (TATOLI) – Governu liuhosi Konsellu Ministru (KM), kuarta ne’e deside no aprova Projetu Dekretu-Lei ba alterasaun Dekretu-Lei númeru 15/2008 juñu, ne’ebé mak regula pensaun ba kombatente no martir libertasaun nasionál sira (veteranu).
Diploma ne’e, aprezenta hosi Ministru ba Asuntu Kombatente no Libertasaun Nasionál ein ezersísiu, Gil da Costa Monteiro ‘Oan Soru’.
“Alterasaun ne’e, sei halo retensaun sorin balun hosi pensaun ba kombatente no martir libertasaun nasionál sira, nune’e bainhira mosu karik opozisaun espresa ruma sei aplika retensaun ne’e. Montante sira ne’ebé hetan retensaun hosi Estadu sei fila ba depózitu iha konta bankária titulár Konsellu Kombatente Libertasaun Nasionál no sira duni maka sei administra”, informa Ministru Reforma Lejislativa Asuntu Parlamentar (MRLAP), Fidelis Manuel Leite Magalhães hafoin reuniaun ezekutivu iha Palásiu Governu.
Notísia Relevante: SEACLN Esklarese Governu Ko’a Veteranu Nia Osan $30.00
Veteranu Aseita Governu Koa Osan Pensaun
Oan Soru: “Ko’a Osan Veteranu Hanesan Polítika ba Sira nia Futuru”
Nune’e, governante ne’e informa alterasaun ne’ebé Governu halo ona sei haruka filafali ba Prezidenti Repúblika hodi hetan promulgasaun.
“Kona-ba futuru osan sira ne’ebé sei administra hosi Konsellu Kombatente Libertasaun Nasionál, naturalmente katak ninia objetivu ne’e atu ba interese no benefísiu ba veteranu sira”, nia akresenta.
Antes ne’e, veteranu sira ne’ebé mak hetan pensaun inklui reprezentante povu iha uma-fukun Parlamentu Nasionál (PN), kestiona no husu klarifikasaun kona-ba razaun ko’a pensaun veteranu kada fulan $30, hahú husi janeiru 2020.
Atuál Sekretáriu Estadu Asuntu Kombatente no Libertasaun Nasionál, Gil da Costa Monteiro “Oan Soru’’, hateten polítika Governu nian maka atu garante sustentabilidade ba veteranu sira, liu-liu atu transforma ba investimentu ida hodi husik hela ba jerasaun veteranu sira nia-oan iha futuru.
“Ita-nia Veteranu uluk luta ba rai ida ne’e hodi hetan ukun-an, tanba ne’e hahú agora ita tenke kria kondisaun bainhira mate bele husik hela buat di’ak ruma ba ita-nia oan sira”, refere Oan Soru.
Nia esplika, osan ne’ebé ko’a ona Governu bele halo fali hanesan modelu banku veteranu, maibé buat sira ne’e hotu daudaun sei iha diskusaun pesoál no téknika sira komesa halo prepasaun téknika.
Antes atu implementa polítika ne’e, Sekretaria Estadu Asuntu Kombatente no Libertasaun Nasionál (SEACLN-sigla portugés) hala’o ona sensibilizasaun ba veteranu iha munisípiu hotu to’o iha nasionál ne’ebé sai benefisiáriu no simu pensaun husi Estadu.
Nune’e mós, liuhusi Kongresu Nasionál Kombatente no Libertasaun Nasionál aprova deliberasaun númeru 1 iha loron 21 dezembru 2019, hodi fó kbiit ba iha SEACLN hodi hahú implementa polítika kriasaun fundu investimentu ba veteranu.
Jornalista: Antónia Gusmão
Editora: Julia Chatarina
