DILI, 05 marsu 2020 (TATOLI)–Diretóra Jerál Ministériu Negósiu Estranjeiru no Kooperasaun ba Asuntu ASEAN, Milena Rangel hateten iha fulan-maiu 2020, ekipa tékniku hosi nasaun membru ASEAN ho Sekretariadu ASEAN sei vizita Timor-Leste (TL) hodi halo tan avaliasaun ba preprasaun nasaun ne’e nian iha pilár sosiu-kulturál.
“La kle’ur tan ita sei simu bainaka hosi Estadu membru ASEAN no Sekretariadu ASEAN atu mai avalia ba asuntu sósiu-kulturál liuliu kona-ba pergunta 60 ne’ebé antes ne’e sira fó mai ita entaun responde hotu ona hosi liña ministeriál sira. Agora hein atu partilla de’it ba Sekretariadu ASEAN no Estadu membru sira,” katak Milena ba jornalista sira iha Edifísiu MNEK, Praia dos Coqeiros, Dili, ohin.
Notísia Relevante :2020, ASEAN Avalia Adezaun TL Iha Área Kultura No Ekonomia
No iha fulan-juñu 2020, ekipa boot Misaun “Fact Finding” ASEAN sei observa tan Timor-Leste ninian preparasaun iha pilár ekonomia tanba daudaun ne’e hetan ona kontaktu hosi Sekretariadu ASEAN hodi informa ba MNEK kona-ba planu ne’e.
“Hakarak hateten se buat sira ne’e akontese duni entaun juñu nia laran Timor-Leste bele halo hotu ona fact-finding mision ne’e, ho ida-ne’e preparasaun tékniku ASEAN husu ita atu prepara hotu iha juñu agora,” nia haklaken.
Notísia Relevante :Timor-Leste Responde Ona Pergunta 60 Hosi ASEAN
Mezmu ekipa tékniku ASEAN halo beibeik ona avaliasaun ba TL ninia preparasaun maibé sira seidauk entrega relatóriu ne’e ba Governu Timor-Leste.
“Hosi grupu traballu ne’ebé nasaun sira halo ita la asesu sira-nia relatóriu, ne’ebé sira uza hanesan konsome, de’it la fahe ba Timor. Maibé, bainhira sira iha Timor sira dehan ita konsege hala’o misaun ida di’ak tebes,” Milena esplika.
Notísia Relevante :Vizita “Fact-Finding Mission” ASEAN Mai Timor-Leste Foin Primeravés
Jornalista : Hortencio Sanchez
Editór : Agapito dos Santos
