DILI, 06 marsu 2020 (TATOLI)—Sekretáriu Jerál Partidu FRETILIN, Marí Alkatiri konsidera preokupasaun Prezidente Repúblika, Francisco Guterres ‘Lú Olo’, ne’e razoável tanba la prenxe rekezitu legalidade.
“Ne’e razoável. Koligasaun foun ne’e la tuir lei partidu polítiku. Ne’e hanesan labarik ida iha inan-nia kabun maibé inan hetan moras hodi hahoris duni labarik ne’e maibé mai mate tiha ona,” dehan Mari Alkatiri ba jornalista sira, hafoin partisipa abertura kongresu partidu KHUNTO nian ne’ebé hala’o iha Sentru Konvensaun Dili (CCD-sigla portugés), ohin.
Alkatiri dehan, partidu polítiku sira atu halo koligasaun foun hodi forma Governu tenke prenxe buat hotu-hotu. Situasaun ida-ne’e, nia hateten, mak akontese ba koligasaun foun ne’ebé lidera hosi Partidu Congresso Nacional de Reconstrução de Timor (CNRT).
Notísia Relevante: Koligasaun Foun Presiza Prenxe Rekezitu Balun
Jornalista : Evaristo Soares Martins
Editór : Cancio Ximenes
