DILI, 06 marsu 2020 (TATOLI)—Bankada Parlamentár FRETILIN hahú ona prosesu atu hatama ba Parlamentu Nasionál, proposta alterasaun ba Lei kona-ba Arte Marsial ne’ebé ezisti tiha ona no posibilidade hato’o proposta lei foun atu regula organizasaun arte marsiál sira iha Timor-Leste.
Tuir komunikadu imprensa ne’ebé Ajénsia TATOLI asesu informa, prosesu ne’ebé Bankada FRETILIN hala’o ne’e sei komplementa rezolusaun ne’ebé VIII Governu Konstitusional aprova hodi reativa fila fali organizasaun arte marsiál sira ne’ebé mak Governu taka tiha ona. Prosesu ne’e atu implementa mós kompromisu eleitoral ne’ebé FRETILIN halo iha 2018 atu reativa fila fali organizasaun arte marsiál sira iha tinan lima (5) mandatu lejislativu ida ne’e nia laran.
“Bankada FRETILIN saúda VIII Governu Konstitusional nia inisiativa hodi reativa fila fali organizasaun arte marsial sira ne’ebé mak Governu ida uluk taka tiha. Bankada FRETILIN hola inisiativa ida ne’e, hamutuk ho bankada PLP no bankada KHUNTO, tan rekoñese arte marsiál sira-nia importansia nu’udar atividade desportiva no reflete mós ba públiku nia opiniaun no hanoin sira ne’ebé mai husi organizasaun arte marsiál sira rasik atu regulariza no enkuadra didi’ak no loloos organizasaun arte marsial sira iha ita-nia sosiedade,” dehan Xefe Bankada FRETILIN, Deputadu Aniceto Louguinhos Guterres Lopes, liuhusu komunikadi imlrensa ne’ebé TATOLI asesu, ohin.
Iha prosesu preparasaun ne’e, komunikadu ne’e hateten, la kleur tan FRETILIN sei hala’o mós konsulta ho reprezentante husi organizasaun arte marsiál sira no entidade relevante sira seluk atu garante katak lejislasaun ne’ebé parlamentu atu altera no lejislasaun foun ruma ne’ebé parlamentu atu introdús sei akomoda ho di’ak organizasaun arte marsiál sira-nia hanoin no nesesidade no tuir mós Timor-Leste nia realidade.
Notísia Relevante: KM Aprova Rezolusaun Reativa Arte-Marsiál
Jornalista : Osória Marques
Editór : Cancio Ximenes
