DILI, 06 marsu 2020 (TATOLI)-Ministériu Saúde iha kinta (05/03/2020) hala’o diseminasaun informasaun kona-ba prevensaun coronavirus ba Autoridade Lokál, Postu Administrativu no Autoridade Munisípiu Dili.
”Ita hotu daudaun ne’e preokupa tebes ho Coronavirus maibé ita agradese tebes ba esforsu husi ekipa surtu ne’ebé mak durante husi fulan-janeiru too agora ita-nia ekipa sira halo vijilánsia masimu tebes,”katak Vise Ministra Elia bainhira halo abertura ba atividade ne’e iha Palasiu Sinzas Caicoli Dili.
Notísia Relevante :OMS Sensibiliza Medida Preventiva Hosi Virus Corona
Ekipa Ministériu Saúde ho liña ministeriál halo vijilánsia masimu iha Aeroportu, Portu no Fronteira Terrestre hodi halo prevensaun ba infensaun Coronavirus.
Notísia Relevante :MS ho OMS Seidauk Identifika Pasiente Coronavirus iha TL
”Iha mundu tomak OMS deklara katak iha nasaun balun afetadu mak husi nasaun Xina Korea, Japaun, Iran ho Itália ne’ebé mak iha risku boot persiza tau atensaun liu no ita mós hatene katak trasmisaun ne’e da’et lalais deit maibé la’os ba ema hotu-hotu maibé ita ida-idak persiza halo prevensaun,” deklara Vise Ministra Kuidadu Saúde Primaria.
Notísia Relevante :Psikolójikamente Timoroan Sira Tenke Preparadu ba Coronavirus
Nune’e mós Ministériu Saúde ho Organizasaun Mundiál Saúde preparadu atu kontinua halo desiminasaun informasaun ba públiku kona-ba prevensaun coronavirus.
Iha fatin hanesan representante UNICEF iha Timor-Leste Valerie Taton husu ba entidade hotu atu kolabora no kontribui ba Ministériu Saúde no OMS hodi halo prevensaun.
Notísia Relevante :Prevene Coronavirus iha Timor-Leste Papél Mídia Importante ba Divulgasaun Informasaun
“Hau-nia mensajen ba ita hotu katak fase liman ho sabaun la’os deit ba Coronavirus maibé prevene mós ba moras oioin entaun ida ne’e mak iha oportunidade ida atu prátika hodi halo ho loloos,”apela Valerie.
Partisipa iha programa desiminasaun informasaun ne’e maka Autoridade lokál husi Postu administrativu neen iha Dili, Adjuntu Autoridade Munisípiu Dili, Represenante OMS iha Timor-Leste, Diretora Jerál Prestasaun Saúde inklui profisionál saúde sira iha Ministériu Saúde.
Notísia Relevante :Xina Entrega Ekipamentu Prevensaun Coronavirus ba TL
Jornalista : Felicidade Ximenes
Editór : Agapito dos Santos
