DILI, 10 marsu 2020 (TATOLI) – Diretór Operasaun Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA,IP), Gabriel da Costa, kontinua aviza ba operadór ekonómiku sira hanesan loja, supermerkadu, no seluk tan, atu labele oferese ka fa’an produtu liu prazu ba konsumidór sira tanba fó impaktu negativu ba saúde públika.
“Ida-ne’e ami sempre fó hatene ba distributór sira, liuliu ba loja sira ne’ebé maka fa’an produtu nesesidade bázika sira, bainhira sasan besik liu ona prazu tenke fó hatene antes ba ami. Kuandu sira la fó hatene ami maka bainhira AIFAESA ba halo inspesaun no hetan produtu sira ne’ebé liu prazu ona, ami sei halo segel no prosesu tuir lei ne’ebé maka AIFAESA iha”, tenik Gabriel da Costa iha ninia knaar fatin, Matadoro, tersa ne’e.
Notísia Relevante: Kompañia Lisun Halo Destruisaun ba Serveja Kaixa 1.906 Tanba Liu Prazu
Nia dehan, ezemplu maka hanesan iha sábadu semana kotuk, bainhira kompañia Lisun iha produtu balun ne’ebé maka sira rasik konsidera liu prazu ona, ho inisiativa rasik sira halo destruisaun ba produtu hirak ne’e, maibé antes ne’e sira haruka karta ba AIFAESA hodi akompaña halo destruisaun.
Tuir Diretór Operasaun, durante ne’e kompañia rua maka sempre fó hatene ba AIFAESA kona-ba produtu ninia data liu prazu.
“Kompañia Perisos no Lucky Market maka sempre fó hatene ami, katak sira ninia sasan besik prazu liu ona, entaun sira halo segel no sira bolu ami ba haree kedan durante halo destruisaun”, nia subliña.
Jornalista: Natalino Costa
Editora: Julia Chatarina
