DILI, 10 marsu 2020 (TATOLI)–Governu Japaun liuhosi programa fundu Asisténsia Seguransa umanitária ba komunidade (GGP-sigla inglés), tersa ne’e, asina nota entendimentu (MoU-sigla inglés) hodi apoiu osan hamutuk $363,396 ba ONG lokál hosi munisípiu haat ba projetu konstrusaun sala eskola no dormitóriu ba estudante sira.
MoU ne’e asina direta hosi Embaixadór Interinu Japaun iha Timor-Leste, Shingo HIGASHIMOT ho reprezentante ONG lokál haat ne’e iha Embaixada Japaun Dili.
Organizasaun Naun Govermentál haat ne’e maka Asosiasaun Foinsa’e Dezenvolvimentu Rurál iha Munisípiu Liquiçá ho totál orsamentu hamutuk $90,909. Komunidade Klaretianu iha Timor-Leste ba projetu konstrusaun sala eskola no dormitóriu ESTV Claret iha Tilomar,Covalima, ho montante $90,909.
Fundasaun Amizade Tamba Amor (FUNDAMOR) Munisípiu Lautém ho totál osan $90,699 no Sentru Treinamentu Vokasionál Juventude Manatuto ho osan $90,879.
Embaixadór Interinu Japaun iha Timor-Leste, Shingo HIGASHIMOT husu ba benefisiáriu progama GGP 2020 atu implementa projetu ne’e ho susesu hodi apoiu prosesu dezenvolvimentu.
“Ha’u hato’o ha’u-nia gratidaun ba organizasaun implementadór no enkoraza atu halo kooperasaun di’ak ho autoridade relevante no hadi’a jestaun organizasaun nian atubele implementa projetu ne’e ho susesu.
Governu Japaun ho Timor-Leste liuhosi fundu GGP hala’o papél importante hodi habelar servisu asisténsia sosiál ba komunidade tanba liuhosi programa ne’e konsege implementa ona projetu hamutuk 115 iha territóriu hahú kedas 2000 to’o 2020.
Programa fundu Asisténsia Seguransa Umanitária ba komunidade fó asisténsia ba kontrusaun infraestrutura bázika no seluk tan liuliu kontribui atu Timor-Leste atinje ninia meta ba Planu Dezenvolvimentu Estratéjiku Nasionál (PEDN) períodu 2011-2030.
Iha biban hanesan, Vise Ministru Administrasaun Estatál (MAE), Abílio José Caetano, orgullu ho apoiu hosi Governu no povu Japaun hodi aselera prosesu dezenvolvimentu iha Timor-Leste.
Jornalista : Hortencio Sanchez
Editór : Agapito dos Santos
