DILI, 10 marsu 2020 (TATOLI) – Diretór Operasaun Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA,IP), Gabriel da Costa, informa iha sábadu semana kotuk, ekipa AIFAESA akompaña kompañia Lisun Unipesoal,Lda halo destruisaun voluntariamente ba Serveja hamutuk kaixa 1.906, ne’ebé durante ne’e rai hela iha armazein tanba konsidera produtu liu ona.
Atividade ne’e hala’o iha Kompañia Lisun ninia fatin iha Fatuhada.
“Kompañia Lisun rasik haruka karta mai AIFAESA katak produtu serveja ne’ebé maka sira iha, presiza halo detruisaun tanba produtu sira ne’e tuir sira liu ona prazu no labele destribui no fa’an ona ba konsumidór atu konsumu”, tenik Diretór ne’e iha ninia knaar fatin, Matadoro, tersa ne’e.
Nia dehan, produtu ne’ebé maka parte empreza halo destruisaun maka hanesan serveja ho marka Bintang hamutuk kaixa 1.845, marka Tiger kaixa 2 no marka ABC kaixa 59.
“Tótal serveja ne’ebé maka ami hamutuk ho kompañia Lisun halo destruisaun maka hamutuk kaixa 1.906”, nia realsa.
Nune’e, AIFAESA apresia inisiativa kompañia Lisun ne’ebé halo ona destruisaun ba produtu liu prazu.
“Ita haree katak husi kompañia Lisun iha inisiativa rasik hakarak servisu ho AIFAESA, tanba fó ona ezemplu di’ak ba ita-nian operadór ekonomia sira ka distributór seluk kuandu produtu ne’ebé maka liu prazu ona, sira tenki fó hatene antes ba AIFAESA atubele halo destruisaun. Nune’e ami-nia ekipa bele ba observa hodi falun tiha plástiku no halo segel hodi labele fa’an tan no hein ba halo destruisaun de’it hanesan saida maka kompañia Lisun halo”, nia subliña.
Jornalista: Natalino Costa
Editora: Julia Chatarina
