DILI, 11 marsu 2020 (TATOLI)–Espoza Prezidente Repúblika (PR), Cidália Nobre Lopez Mouzinho Guterres hamutuk ho Diretóra PLAN Internasionál, Dilyana Ximenes, kuarta (11/03/2020) hala’o vízita ida bá Ospitál Nasionál Guido Valadares Dili (HNGV-sigla Portugés) hodi observa diretamente lala’ok atendimentu no funsionamentu ospitál nian ba pasiente sira.
Vizita ne’e parte ida hodi komemora Loron Mundiál Feto ne’ebé monu iha loron 08 fulan-marsu 2020, maibé Timor-Leste sei selebra iha loron kinta 12 fulan-marsu iha Dili.
”Liga ba loron feto nian entaun ami-nia vizita iha fatin internamentu feto nian no mós feto sira iha sala maternidade,” dehan Espoza PR ba jornalista sira hafoin termina vozita iha HNGV, Dili, ohin.
Nia dehan maski profisionál saúde iha HNVG ida-idak hala’o ninia knaar ho di’ak, maibé ho vizita ne’e sei motiva liután sira atu atende pasiente sira ho profisionál.
Iha fatin hanesan, Diretór Ezekutivu HNGV, Aniceto Barreto orgullu ho prenzensa espoza Prezidente Repúblika nian bá ospitál nasionál hodi fó motivasaun ba profisionál saúde ho pasiente sira.
“Vízita ne’e mós atu selebra loron internasionál feto ne’ebé mak selebra aban (kinta, 12/03/2020) hodi suporta ba inan-feton sira ne’ebé mak moras atu forsa nafatin hodi enfrenta situasaun saida de’it mak iha,” katak Aniceto.
Entretantu, iha vizita espoza PR ho Diretora PLAN Internasionál ne’e hetan akompañamentu hosi espoza hosi ofisiál PNTL, Gabinete Espoza PR no seluk tan.
Jornalista : Felicidade Ximenes
Editór : Agapito dos Santos
