DILI, 11 marsu 2020 (TATOLI) – Ministra Finansa ein ezersísiu, Sara Lobo Brites, informa semana oin Ministériu Finansa (MF) sei aprezenta proposta ba Konsellu Ministru hodi halo levantamentu millaun $250 husi Fundu Petrolíferu (FP) hodi sustenta mákina Estadu.
“Ohin iha Konsellu Ministru seidauk deskute kona-ba husu autorizasaun ba Parlamentu hodi halo levantamentu, maibé karik semana oin maka ami sei deskute. Tuir proposta ne’ebé Ministériu Finansa sei aprezenta hamutuk millaun $250, ne’ebé montante ne’e iha dentru montante husi Rendimentu Sustentável Estimadu (RSE)”, dehan Sara Lobo ba Agência Tatoli iha Palásiu Governu, kuarta ne’e.
Nia refere liután, kona-ba saldo dadaun ne’e sei iha montante millaun $215.
“Ita ninia Dotasaun Orsamentu Temporáriu (DOT) bafulan-tolu tutuir malu fixa ho montante millaun $116, entaun ita ninia saldo agora iha millaun $215. Reseita doméstika média pur volta millaun $15 kada fulan, entaun bainhira ita fixa kada fulan duodésimu ho montante millaun $116 no sukat ho saldo agora ne’e, ita to’o de’it ba fulan-rua”, nia akresenta.
Governante ne’e haktuir, iha esperiénsia fulan-jeneiru no fevereiru, ezekusaun menus hosi millaun $116, pur volta millaun $50-resin.
“Ho hanoin ida katak bainhira ezekusaun maka konstante ka mantein nafatin porsentu 50 de’it maka ninia montante ne’e sei bele kobre to’o fulan-haat”, Sara Lobo realsa.
Tuir nia, bainhira liga ho aprovasaun ba alterasaun datoluk Lei Orsamentu no Jestaun Finanseira númeru 13/2019 artigu 31, ne’ebé maka ko’alia kona-ba rejime doudésimu, númeru ne’e fó esesaun iha artigu 31 no fó biban Governu atubele atende nesesidade sira ne’ebé maka boot hanesan selu dívida públika ne’ebé loron pagamentu monu iha fulan-marsu no ninia montante ladun boot.
“Ida ne’e inklui nesesidade balun ne’ebé Governu tenke selu iha marsu nia-laran, katak despeza iha marsu sei iha liu oituan husi ida ne’ebé ezekuta iha fevereiru”, nia salienta.
Entretantu, Governu liuhosi reuniaun Konsellu Ministru aprova DOT ba fevereiru 2020 ho montante $116.449,057.
Montante ne’e totál despeza fahe ba kategoria haat hanesan saláriu no vensimentu $17.852,067, bens no servisu $38.614,980, transferénsia públika $26.591,048, no kapitál dezenvolvimentu $33.390,953, nune’e ninian totál $116.449,057.
DOT ba janeiru 2020 ho valór millaun $116.4, ne’ebé fahe ba kategoria saláriu no vensimentu hamutuk millaun $17,8, bens no servisu millaun $38,6, transferénsia públika millaun $26,6 no kapitál dezenvolvimentu millaun $33,4 no kapitál menór suspende tanba relativa ho prosesu aprovizionamentu.
Nune’e DOT ba marsu hamutuk $116.449,057, fahe ba karegoria saláriu no vensimentu $17.852,067, bens no servisu $38.614,980, transferénsia públika $26.591,048, kapitál dezenvolvimentu $33.390,953.
Jornalista: Antónia Gusmão
Editora: Julia Chatarina
