DILI, 16 marsu 2020 (TATOLI) – Ezekutivu sira liuhosi sorumutu Konsellu Ministru (KM) estraordinária, deside solisita Prezidente Repúblika (PR), Francisco Guterres ‘Lú Olo’, hodi dekreta Estadu Emerjénsia relasiona ho evolusaun no preokupasaun ba situasaun epidemiolójika ba kazu rejistadu husi Coronavírus ka COVID-19 iha eskala globál.
Tanba ne’e, situasaun ne’e eziji Governu aplika medida estraordinária ho karatér urjente hodi bele trava situasaun ne’e afeta ba rai-laran.
“Hanesan Organizasaun Mundial Saúde (OMS) mós deklara katak COVID-19 ne’e hanesan pandemia, katak moras ida-ne’ebé hada’et iha kontinente hotu iha mundu tomak. Tanba ne’e Konsellu Ministru prepara hela atu solita ba Prezidente Repúblika hodi bele dekreta Estadu Emerjénsia”, hateten Ministru Reforma Lejizlativa no Asuntu Parlamentár, Fidelis Manuel Leite Magalhães hafoin reuniaun Ezekutivu iha Palásiu Governu, segunda ne’e.
Nune’e, liuhosi desizaun KM aprova no halo mós deliberasaun kona-ba medida emediata sira ne’ebé maka Governu sei foti no medida emediata balun ne’ebé sei hatuur iha rezolusaun balun, inklui iha proposta ba Estadu Emerjénsia ne’ebé sei hato’o ba Xefe Estadu.
“Medida konjuntu ida-ne’ebé intensifika ba prevensaun no sensibilizasaun ba populasaun ho konjuntu medida sira ho objetivu atu intensifika ba prevensaun no sensibilizasaun ba populasaun”, nia adianta.
Relasiona ho Estadu Emerjénsia, Ministru Koordenador Asuntu Ekonómiku interinu ne’e esplika Governu sei laiha kbiit bainhira laiha dekretu Estadu Emerjénsia.
“Ha’u fó ezemplu ida maka hanesan buat balun mak Governu nia kbiit la to’o sein iha dekretu ida kona-ba Estadu emerjénsia, ne’ebé hanesan bandu ema ninia movimentu, ida fali maka medida emediata sira kona-ba kuarentena obrigatóriu sira. Buat hirak ne’e presiza ita nia Prezidenti Repúblika dekreta tiha ona katak ita Estadu Emerjénsia maka Governu hanesan ezekutivu iha podér atu halo”, Fidelis subliña.
Governante ne’e salienta, kuandu Xefe Estadu dekreta ona diploma ne’e maka ezekutivu sira sei fásil atu foti desizaun boot sira ne’ebé maka iha implikasaun ba moris sidadaun-nian loron-loron tanba situasaun emerjénsia ne’e la’ós hanesan situasaun baibain.
Jornalista: Antónia Gusmão
Editora: Julia Chatarina
