DILI, 05 maiu 2020 (TATOLI)–Organizasaun Naun Govermentál Catalpa oras ne’e prodús hela ekipamentu prevensaun COVID-19 hanesan vizeira hodi oferese ba Governu atu tulun profisionál saúde sira bainhira atende kazu coronavirus.
“Kada loron ami prodús vizeira 17 maibé kle’ur uitoan tanba ami prodús uluk ne’e entrega hotu ona ba Minsitériu Saúde hodi ajuda ba profisionál saúde sira,” informa Jestór Produsaun ONG Catalpa, Pedro Luís Marques de Almeida ba TATOLI, iha ninia servisu fatin, Colmera, segunda (04/05/2020).
Nia dehan organizasaun ne’e uza mákina printer 3D, uza filamentu plástiku hodi halo objetu saida de’it para prodús vizeira kada loron 17 ba prevene transmisaun coronavirus.
“Uza vizeira plástiku transparente ne’e atu proteje profisionál saúde sira husi COVID-19 hanesan proteje husi matan inus no dada iis,” nia esplika liután.
Nia relata vizeira ne’ebé Catalpa prodús ne’e tanba hetan kooperasaun servisu ho UNDP, Knua Juventude Fila Liman, Dili International School no seluk tan.
Notísia Relevante :UNDP, Catalpa ho Parseiru Apoiu Ekipamentu Prevene COVID-19 ba MS
“Agora daudaun prodúz ona 200-resin, semana-semana imprime ne’e aumenta liután entaun ita ajuda parseiru sira liuliu Ministériu Saúde ho maluk Timor entrega ba Marie Stopes no mós entrega ba Sentru Izolamentu Vera-Cruz no mós Pradet entaun kada semana aumenta,” nia tenik tan.
Matéria prima ba produsaun vizeira ne’e nia esplika halo ho plástiku, no agora Governu Austrália apoiu plástiku kilógrama 20 hodi prodús vizeira rihun ida.
“Vizeira ne’e ita haree nia kualidade di’ak ba ita atu seguru COVID-19 tanba médiku sira konfirma doutór sira husi Meizies Austrália tanba ne’e la’ós ekipamentu profisionál maibé ida-ne’e ekipamentu emerjénsia nian,” nia realsa.
Jestór produsaun ne’e esplika Catalpa iha mákina printer 3D ida, Dili International School iha ida, Knua Juventude Fila Liman iha rua no Simile iha ida hodi prodús vizeira.
Jornalista : Felicidade Ximenes
Editór : Agapito dos Santos
