DILI, 08 maiu 2020 (TATOLI)-Cruz Vermella Timor-Leste (CVTL-Sigla-portugés), sesta (08/05/2020) ohin komemora aniversáriu Cruz Vermella mundiál ba dala 157 ho tema obrigada ba ita-nia servisu ba iha liña oin COVID-19.
Prezidene CVTL, Madalena Hanjam informa ba Jornalista sira katak ohin, CVTL la komemora ho serimonia boot, maibé halo de’it mobilizasaun masa ba voluntáriu CVTL nian atu kontinua suporta nafatin ba propagasaun surtu COVID-19 iha Timor-Leste.
CVTL iha kritéria neen ba prevensaun COVID-19, dahuluk, maka mobilizasaun sistema, reforsa nafatin ita-nia sistema, mobiliza voluntariu no prepara an di’ak liután para haree ba parte hotu liliu preparasaun, prevensaun iha kuarentena, izolamentu, halo tratamentu didi’ak para evita kontamisaun moras ba ema seluk.
”Entaun prosesu hirak ne’e ita hotu kontribui tanba iha komemorasaun ida ne’e iha espiritu voluntarismu ne’e mak importante ba ema hotu atu halibur malu tanba ne’e mak ohin lahalo komemorasaun maibé mobilizasaun,” reforsa Madalena Hanjam iha Bairo-Formosa Dili, ohin.
CVTL mós buka atu tulun grupu vulneravél sira ne’ebé maka infrenta ai-han durante implementasaun estadu emerjénsia.
”Ita mós tenki fó atensaun ba labarik kiik husi tinan lima mai kra’ik tenki hahán iha no inan isin rua mos tenki iha aihan saudavel para haree sira nia-an no haree mos bebé oan sira no grupu katuas ho ferik sira mak vulneravel tebes entaun ida ne’e mak ami nia luta ba halibur osan oituan para komesa atu ajuda ema sira ne’e,” nia realsa liután.
Entretantu, iha komemorasaun ohin, CVTL mós komemora aniversariu fundadór ne’ebé funda organizasaun mundiál, Henry Dunant tanba servisu ho voluntariu hodi haree vitima hosi funu sira iha tinan 157 liubá.
Cruz Vermella Timor-Leste iha voluntáriu rihun 5 maka perkora iha territóriu Timor-Leste hodi halo prevensaun ba transmisaun coronavirus.
Jornalista :Felicidade Ximenes
Editór : Agapito dos Santos
