DILI, 08 maiu 2020 (TATOLI) – Ministériu Obra Públiku (MOP) asina tan akordu ho operadór telekomunikasaun tolu hanesan Timor-Telecom, Telemor no Telkomcel, atu fornese subsídiu pre-pagu eletrisidade ba kliente Eletricidade de Timor-Leste (EDTL) faze daruak iha períodu estensaun Estadu Emerjénsia ne’ebé kada kliente sei hetan $15, husi totál kliente 160.555.
Ministru Obra Públika, Salvador Eugênio Soares do Reis Pires, informa hafoin asina akordu ho operadór tolu ne’e, kliente EDTL bele manda ona mensajen ba hotline 12150 atu asesu subsídiu iha fulan-maiu.
“Hahú ohin kliente sira bele manda ona mensajen ba operadór telekomunikasaun tolu ho númeru hotline 12150 atu hetan subsídiu pre-pagu eletrisidade ho kustu $15,” tenik Ministru Salvador hafoin asina akordu ho operadór sira iha edifisiu EDTL, Caicoli, sesta ne’e.
Meiu atu asesu subsídiu ne’e hakerek EDTL #númeru kontadór manda ba númeru hotline 12150 ne’ebé bele uza sim card Timor-Telecom, Telemor no Telkomcel..
Subsídiu pre-pagu ne’e iha ámbitu implementasaun Dekretu Governu númeru 08/2020 30 abríl, kona-ba medida ezekusaun deklarasaun Estadu Emerjénsia liuhosi Dekretu Prezidente Repúblika númeru 32/2020 27 abríl, ne’ebé temi iha artigu 26 alínea 1 kona-ba área asensiál sira inklui área eletrisidade no alínea 2 ne’ebé fó kompeténsia ba membru governu hodi hasai despaisu.
Subsídiu Faze Daruak Sei Atribui ba Kliente Pós-pagu 1.614
Nune’e, MOP liuhosi despaisu númeru 804/MOP/V/2020 kona-ba medida apoia populasaun durante Estadu Emerjénsia iha enerjia elétrika no abastesementu bee.
“Ita-nia EDTL atribui tan valór $15 (ekivalente 125 kWh) ba kada kliente pre-pagu ho totál kliente pre-pagu mak 160.555. Iha fase daruak ne’e, MOP konsidera sei atribui mós subsídiu pagamentu porsentu 50 husi tarifa referente ba konsumedór eletrisidade iha regime pós-pagu iha períodu atuál Estadu Emerjénsia, hahú 28 abríl to’o 27 maiu 2020 ho totál kliente pós-pagu mak 1.614,” Ministru Salvadór akresnta.
MOP asina nota entendimentu daruak ho operadór tolu, hodi fasilita distribuisaun subsídiu subsídiu, hahú loron 8 to’o 27 maiu.
Objetivu fó subsídiu pulsa liuhosi hotline operadór sira ne’e atu kontinua kontribui ba prevensaun COVID-19, nune’e labele hadaet ba komunidade ho maneira lalika mai konsentra sosa pulsa iha estasaun fa’an pulsa durante Estadu Emerjénsia nia laran.
MOP-EDTL rejista katak iha fase atribuisaun dahuluk subsídiu pre-pagu eletrisidade kliente ne’ebé hetan ha ativa hamutuk 128.657 (ekivalente porsentu 80) husi totál kliente 160.555.
Ho nune’e, Ministru Salvador agradese ba parseiru sira liuliu operadór kompañia no operadór telekomunikasaun inklui tékniku sira.
Iha sorin seluk, Reprezentante Telkomcel, Samanta Abel, informa operadór Telkomcel prontu atu apoia Governu hodi fornese subsídiu pre-pagu eletetrisidade ba kliente sira.
Jornalista: Florencio Miranda Ximenes
Editora: Julia Chatarina
