DILI, 10 maiu 2020 (TATOLI) – Benefisáriu ka kliente Eletricidade de Timor Leste (EDTL) ne’ebé asesu ona subsídiu pre-pagu eletrisidade faze daruak ho valór $15 hato’o agradesementu ba Ministériu Obra Públiku (MOP) tanba fasilita ona sidadaun sira durante períodu Estadu Emerjénsia.
Kliente EDTL iha Becusse Sentru, Florindo da Costa, agradese no orgullu ba Governu liuliu Ministériu Obra Públiku (MOP) tanba fó ona subsídiu pre-pagu eletrisiadade faze daruak hodi fasilita komunidade atu labele halo movimentu ba sosa pulsa pre-pagu.
“Ha’u agradese Governu liuliu Ministru Obra Públiku, tanba fó subsídiu ba ami iha faze dahuluk no daruak ho valór pre-pagu $30 ona,” dehan kliente EDTL ne’e ba Agência Tatoli, iha Becora, domingu ne’e.
Tuir Florindo, subsídiu pre-pagu eletrisidade ne’e fasilita duni iha períodu Estadu Emerjénsia, ne’ebé Governu ho sidadaun sira hamutuk luta kontra surtu COVID-19.
“Ami haree ne’e meiu ida atu konsumedór elétrika labele halo movimentu no halibur iha fatin ida hodi sosa pulsa no hadook-an husi propagasaun COVID-19,” nia agradese.
Iha sorin seluk, Kliente EDTL, António Pinto mós agradese ba MOP tanba bele fó ona subsídiu pre-pagu eletrisidade ba kliente EDTL sira iha territóriu laran.
Antes ne’e, Ministru Obra Públiku, Salvador Eugênio Soares do Reis Pires, hateten hafoin asina akordu ho operadór tolu iha sesta (08/05), kliente EDTL bele manda ona mensajen ba hotline 12150 atu asesu subsídiu pre-pagu faze daruak ho montante $15 ba kliente hamutuk 160.555 iha períodu Estadu Emerjénsia fulan-maiu
Meiu atu asesu subsídiu pre-pagu eletrisidade mak hanesan hakerek EDTL #númeru kontadór manda ba númeru hotline 12150 ne’ebé bele uza sim cart Timor-Telecom, Telemor no Telkomcel.
Ministru salvadór adianta, subsídiu pre-pagu eletricidade ne’e iha ambitu implementasaun dekretu Governu númeru 08/2020, 30 abríl kona-ba medida ezekusaun deklarasaun Estadu Emerjéndia, husi dekretu Prezidente Repúblika númeru 32/2020 27 abríl, ne’ebé temi iha artigu 26, alínea 1 kona-ba área asensiál sira inklui área eletrisidade no alínea 2 ne’ebé fó kompeténsia ba membru governu hodi hasai despaisu.
Ho nune’e, MOP liuhosi despaisu númeru 804/MOP/V/2020 kona-ba medida apoia populasaun durante Estadu Emerjénsia, ba enerjia elétrika no abastesementu água.
EDTL atribui tan subsídiu ho valór $15 (ekivalente 125 kWh) ba kada kliente ho totál kliente pré-pagu mak 160.555.
Iha faze daruak ne’e, MOP atribui mós subsídiu ba rejime pos-pagu ho pagamentu porsentu 50 durante períodu atuál, hahú 28 abríl to’o 27 maiu 2020 ho totál kliente 1.614.
Objetivu fó subsídiu pre-pagu liuhosi hotline operadór sira ne’e atu kontinua kontribui ba prevensaun COVID-19 ba komunidade, nune’e la konsentra sosa pulsa iha estasaun pulsa durante Estadu Emerjénsia nia-laran.
Jornalista: Florencio Miranda Ximenes
Editora: Julia Chatarina
