DILI, 12 maiu 2020 (TATOLI) – Primeiru-Ministru (PM), Taur Matan Ruak konvoka reuniaun ho Diretór Jerál Estatístika, Elias dos Santos Ferreira, hodi konfirma dadus uma-kain ligadu ho subsídiu $100 ne’ebé Governu sei fó kada uma-kain durante períodu Estadu Emerjénsia ligadu ho surtu COVID-19 iha Timor-Leste.
Tuir Dirijente ne’e, dadus estatístika ne’ebé durante ne’e Diresaun Jerál Estatístika (DGE, sigla portugés) publika maka liga ho sensu agríkola no dadus ne’e mós liga ba uma-kain, tanba ne’e maka Xefe Governu hakarak hatene hodi bele apar ho dadus husi Ministériu Administrasaun Estatál (MAE).
“Ha’u relata katak sensu agríkola iha ona faze finalizasaun no daudaun haruka hela ba Organizasaun Mundiál ba Ai-han no Agrikultura (FAO, sigla inglés) iha Bangkok, nune’e ita bele finaliza no publika. Liga mós ho totál uma-kain iha sensu agríkola no mós totál populasaun iha sensu agríkola, tanba ne’e maka liga ho rejistu famíliar kada aldeia no suku ba subsídiu $100 ba kada família no dadus ne’e agora haruka ona mai nasionál no dadaun kompila hela iha MAE”, informa Elias hafoin reuniaun ho PM Taur iha Palásiu Governu, tersa ne’e.
Notísia Relevante: Governu Aprova Subsídiu ba Família ho Rendimentu Ki’ik Durante Períodu EE
MAE-MSSI Konvoka Reuniaun ho Autoridade Munisípál Verifika Dadus Agregadus Familiár
Elias realsa, kona-ba diferensa dadus entre DGE no MAE, iha tempu badak sei iha mudansa.
“Tanba ne’e, ami presiza dadus sira husi suku ne’ebé haruka ona ba MAE, hodi nune’e ami bele kruza ho dadus husi sensu agríkola tanba sensu ne’e iha dadus uma-kain to’o nível suku tanba ne’e mak atu haree ba ninia diferensa”, nia akresenta.
Ba kestaun ne’e nia parte sei konfirma ho parte MAE.
“Ha’u seidauk fó sai tanba sei iha diferensa, ami husu hela dadus husi MAE atu bele kompila hamutuk no haruka mai hafoin mak kruza fali ho sensu agríkola tanba subsídiu ba kada família ho rendimentu $500 la hetan, tanba ne’e mak sei kruza didi’ak ne’ebé ha’u fiar katak dadus sei iha diferensa tanba ligadu ho osan”, Elias salienta
Entretantu, tuir sensu 2015 totál uma-kain hamutuk 204.597, enkuantu iha sensu agríkola totál uma-kain sa’e ba 213.400 (aumenta pursentu haat).
Totál populasaun iha tinan-2015 millaun 1,103 maibé iha sensu agríkola 2019, totál populasaun hamutuk millaun 1,208 (aumenta pursentu 3).
Antes ne’e, iha loron 23 abríl Governu liuhosi reuniaun Konsellu Ministru estraordinária, aprova proposta ne’ebé aprezenta husi Ministra Solidaridade Sosiál no Inkluzaun, Armanda Berta dos Santos kona-ba apoiu monetáriu ba agregadu familiár sira durante períodu Estadu Emerjénsia ligadu ho surtu COVID-19 iha Timor-Leste.
Ema sira maka sei sai nu’udar benefisiáriu maka agregadu familiár sira ne’ebé kompostu hosi pelumenuz sidadaun ida, ne‘ebé rejista ona to’o Ioron 31 marsu 2020 iha Livru Rejistu ‘Uma Kain’ no iha família ne’e nia laran nia elementu ida kada fulan no regulár simu osan boot la boot liu husi $500.
Jornalista: Antónia Gusmão
Editora: Julia Chatarina
