DILI, 18 maiu 2020 (TATOLI) – Ministériu Saúde (MS) hamutuk ho Sentru Integradu Jestaun Krize (CIGC, sigla portugés), realiza triajen no vijilánsia sentinela hodi buka hatene karik iha ona transmisaun lokál COVID-19 iha komunidade no prosesu dahuluk hahú iha loron 5 to’o 8 maiu no hahú loron 11 to’o 15 maiu ba daruak iha munisípiu sira.
Tuir Portavóz Sala Situasaun, Sentru Integradu Jestaun Krize (CIGC, sigla portugés), Rui Maria de Araújo, prosesu triajen no vijilánsia sentinela maka bele detekta lalais kazu COVID-19 karik iha ona transmisaun iha komunidade nia le’et.
“Ohin husi totál amostra ba análize laboratóriu ne’ebé maka foti iha prosesu triajen no vijilánsia sentinela iha territóriu laran tomak, porsentu 49 hatudu rezultadu negativu”, dehan Portavóz CIGC liuhosi konferénsia imprensa iha Sala Sentru Mídia COVID-19, iha Sentru Konvensaun Dili (CCD, sigla portugés), segunda ne’e.
Koordenadór Ligasaun Ofisiál ba Forsa Tarefa ne’e adianta, husi totál ne’e, amostra husi Munisípiu Baucau, Lautem no Liquiça maka porsentu 100 hatudu ona negativu, enkuantu munisípiu seluk sei hein rezultadu laboratóriu.
“Fó hanoin hikas ba públiku tomak katak kazu pozitivu no provável COVID-19 ne’ebé deteta iha Timor-Leste hahú 21 marsu, iha mistura ida husi kazu importadu balun ne’ebé hafoin halo transmisaun lokál iha fatin konfinamentu obrigatóriu”, nia haktuir.
Husi kazu 28, kompostu husi 24 konfirmadu no na’in-4 maka konsidera hanesan kazu provável.
Husi kazu rejistadu iha Timor-Leste, porsentu 85 hanesan asimtomátiku no porsentu 100 hanesan kazu kama’an, tanba ne’e kazu hotu rekuperadu iha períodu entre semana rua to’o lima.
Jornalista: Natalino Costa
Editora: Julia Chatarina
