DILI, 21 maiu 2020 (TATOLI) – Governu liuhusi Sekretária Estadu Protesaun Sivíl (SEPS), kinta (21/05/2020), hahú halo distribuisaun apoiu rekuperasaun materiál konstrusaun ba uma-kain 1.316 iha territóriu nasionál, ne’ebé sofre dezastre naturaís iha tinan 2018 ho 2019.
Apoia rekuperasaun ne’e la inklui populasaun ua’in ne’ebé haksumik iha Rejiaun Administrativu Espesiál Oe-Cusse Ambeno (RAEOA).
Dadus husi SEPS hatudu katak númeru benefisiáriu kompostu husi benefisiáriu iha Munisípiu Bobonaro ho total uma-kain 332, Dili (200), Covalima (38), Baucau (156), Liquiça (89), Aileu (20), Lautem (153), Manatuto (76), Manufahi (68), Ermera (86), Viqueque (55) no Munisípiu Ainaro iha benefisiáriu uma-kain 43.
Husi levantamentu SEPS nian hatudu mós katak, uma ne’ebé hetan estragu total 423, estragu natoon (211) no estragu kaman 682. Tanba ne’e, ba uma ne’ebé hetan estragu total sei hetan apoiu simente saku-25, kalén zinku tahan-50, pregu-kalén kilu-rua (2), pregu-ai sentímetru-hitu (7) kilu-rua (2), pregu sentímetru 10 kilu-rua (2), pregu sentímetru -12 kilu-rua (2), besi milímetru-ualu (8) hamutuk lolon-ualu (8), besi milímetru-10 iha lolon-10, arame rolu-ida (1) ho orsamentu ai-kuadradu $360.
Ba uma ne’ebé ho kategoria estragu natoon fahe kalén zinku tahan-50, pregu-kalén kilu-rua(2), pregu sentímetru-hitu (7) iha kilu-rua (2) ho pregu sentímetru-10 iha kilu-rua (2) ho orsamentu $150.
Ba uma ne’ebé ho kondisaun estragu kaman fó kalén tahan-50 ho pregu kalén kilu-rua (2).
Sekretáriu Estadu Protesaun Sivíl, Alexandrino Araújo Xavier, espera katak, apoiu governu nian ne’e bele hakmaan komunidade sira hodi hadi’a fila-fali uma ne’ebé hetan estragu.
“Distribuisaun apoia materiál rekonstrusaun hahú iha Dili no aban ba oin sei kontinua ba munisípiu sira tuir kalendáriu ne’ebé iha, mas la inklui RAEOA,” esklarese Sekretáriu Estadu Alexandrino Araújo Xavier, liuhusi konferénsia imprensa iha Fomento, Dili.
Hafoin konferénsia imprensa ne’e, ekipa SEPS mós kontinua kedas hala’o distribuisaun materiál konstrusaun ba família afetadu sira husi Postu Administrativu Dom Aleixo, Na’in-Feto, Vera Krús ho Kristu Rei, Munisípiu Dili.
Sekretáriu Estadu Alexandrino Araújo Xavier, husu deskulpa ba apoia materiál rekonstrusaun tarde uitoan tanba ho orsamentu duodesimu labele halo intervensaun lalais, maske nune’e, governu esforsu ho meius atu bele apoia duni família afetadu sira.
Nia mós apela ba populasaun sira atu labele fa’an tutan fila-fali materiál sira ne’ebé simu husi governu ba ema seluk.
“Kuandu fa’an tutan sei hetan sansaun,” afirma Sekretáriu Estadu Alexandrino Araújo Xavier.
Jornalista : Nelson de Sousa
Editór : Francisco Simões
