DILI, 28 maiu 2020 (TATOLI) – Governu liuhosi Sekretaria Estadu Komunikasaun Sosiál (SEKOMS) no Instituto Camões liuhosi Embaixada Portugal asina akordu ba prolongasaun projeitu Consultório da Língua para Jornalista (CLJ) to’o 31 dezembru 2020.
Sekretáriu Estadu Komunikasaun Sosiál, Merício Juvinal dos Reis ‘Akara’, lori VIII Governu nia naran apresia kooperasaun Governu Portugal ne’ebé sempre servisu hamutuk ho Timor-Leste hodi dezenvolve área komunikasaun sosiál.
“Ohin ami nain-rua asina akordu kooperasaun ida atu kontinua kooperasaun iha área komunikasaun sosiál, liuliu atu apoia ita iha parte lian. Ohin ita asina hodi estende to’o tinan ne’e ramata”, dehan Akara ba iha Sentru Kulturál, Embaixada Portugal, kinta ne’e.
Kooperasaun ne’e, nu’udar meiu ida atu kapasita jornalista timor-oan sira ho lian portugés, nune’e bele hatene halo reportajen no relatóriu ho lian portugés, ne’ebé nu’udar lian ofisiál.
Kooperasaun entre nasaun rua ne’e la’ós de’it ba lian maibé sei fortifika área tékniku balun atu tulun jornalista sira halo kna’ar di’ak liután.
“Durante ne’e la’o kapas, Governu kontente tanba kuaze ema na’in-200 resin maka sai benefisiáriu ba kooperasaun ida-ne’e no la’ós de’it husi jornalista maibé benefisia mós ba parte instituisaun Governu”, Akara akresenta.
Governante ne’e nota, jornalista barak maka durante ne’e hatene ona ko’alia ona lian portugés ho di’ak, inklui hakerek notísia no reportajen ho lian portugés.
“Signifika katak akordu kooperasaun ne’ebé ita halo ho Governu Portugal durante ne’e la saugate”, nia orgullu.
Nune’e, Governu liuhosi SEKOMS hakarak kontinua kolabora ho Governu Portugal liuhosi Embaixadór sira.
Iha fatin hanesan, Embaixadór Portugal iha Timor-Leste, Pedro Vieira Machado, hateten kooperasaun ne’ebé ne’e iha área Komunikasaun sosiál, liuliu ba projetu CLJ no apoia ba área tékniku sira seluk.
“Ho ida ne’e ami agradese tebes ba Sekretaria Estadu Komunikasaun Sosiál, ba kontinuasaun kooperasaun projetu ne’e iha. Ha’u espera ho koopersaun ne’e bele ajuda jornalista sira halo reportajen di’ak liután iha divulgasaun informasaun sira”, dehan Diplomata ne’e.
Entertantu projetu CLJ, hahú hala’o iha setembru 2016 no termina iha dezembru 2019.
Benefiáriu ba iha projeitu CLJ desde 2016 to’o dezembru 2019 hamutuk 190 no husi númeru ne’e, na’in-40 hanesan profisionál sira ne’ebé servisu iha Governu no na’in-150 hanesan jornalista.
Enkuantu, jornalista sira ne’ebé iha ona melloramentu ba lian portugés husi projetu CLJ iha 2016 to’o 2019 hamutuk 211 no profisionál husi instituisaun Governu hamutuk 57.
Jornalista: Natalino Costa
Editora: Julia Chatarina
