AILEU, 30 maiu 2020 (TATOLI) – Lider Karizmátiku, Kay Rala Xanana Gusmão alerta ba foin-sa’e sira atu pratika atividade desportu arte marsiál ho loloos hodi hadook-aan husi violénsia no krime hodi bele lori organizasaun arte marsiál kontribui ba pás no dezenvolvimentu desportu.
Notísia Relevante : Xanana Apela ba Juventude ho Veteranu Hakmatek no Kontribui ba Pás
Xanana dehan, arte marsiál konsidera nu’udar arte ida husi desportu ninian, tanba ne’e, ba foin-sa’e sira ne’ebé tuir treinu iha kuakér organizasaun arte marsiál sira ne’ebé eziste iha Timor-Leste bele kontribui ba pás.
“Aprende treinu, imi jerasaun Taekwondo Timor-Leste husi Suku Liurai la’ós atu halo violénsia,” hateten Xanana Gusmão, bainhira asiste juventude no labarik sira iha Suku Luirai treinu arte marsiál Taekwondo, sábadu (30/05/2020).
Xanana afirma tan, doutrina kualkér organizasaun arte marsiál hanorin ona atu utiliza ba defende-aan, bainhira enfrenta ameasa ruma ka ajuda ema ruma ne’ebé presiza duni ajuda. Bainhira joven sira la utiliza desportu ne’e ho didi’ak, maka sei prejudika nia-aan rasik no sei la promove organizasaun desportu atu tuir kompetisaun desportu iha nivel nasionál no internasionál.
Notísia Relevante : Xanana ho Ekipa g7+ Apoia Ai-Han ba Uma-Kain 50 iha Suku Liurai
Jornalista : Eugénio Pereira
Editór : Francisco Simões