DILI 01 juñu 2020 (TATOLI) – Asosiasaun Juventude Profísionál Xineza iha Timor-Leste apoia ekipamentu prevensaun surtu COVID-19 ba Sala Situasaun, Sentru Integradu Jestaun Krize (CIGC, sigla portugés).
Ekipamentu sira ne’ebé oferese kompostu husi máskara tipu KN95 hamutuk 100, máskara surúrjika 10.000, luvas 5.000, ókulu 100, dizinfetan 100, no roupa dezkatavél 100.
“Ita hetan tan apoia husi ita belun sira husi asosiasaun komunidade xineza. Ekipamentu sira ne’e atu ajuda ita prevene liután moras COVID-19 nian, ne’ebé akontese dezde fulan-fevereiru 2020 to’o ohin loron. Ita-nia maluk sira ne’e la’ós foin mak ajuda ita maibé dezde iha situasaun difísil to’o agora mós sira iha nafatin iha ita-nia sorin”, hateten Segundu Komandante Operasionál CIGC, Brigadeiru Jenerál João Miranda ‘Aluc Descartes’, hafoin simu ekipamentu iha Salaun Sentru Mídia COVID-19 iha Sentru Konvensaun Dili (CCD, sigla portugés), segunda ne’e.
Nune’e, membru CIGC ne’e agradese tanba iha situasaun difísil sei iha ema ne’ebé hakarak fó apoia ba Timor-Leste.
“Agradese tebes ba apoia ne’e, ita labele haree ba sasán ninia kuantidade boot ka ki’ik, maibé importante maka iha situasan difísil hanesan agora daudaun ita hasoru, sei iha ema hakarak ajuda ita. Tanba ne’e, hodi Sala Situasaun hakarak agradese ba instituisaun no organizasaun naun govermentál hotu ne’ebé mak durante ne’e ajuda ona ita hodi konsege minimiza moras ida-ne’e iha ita-nia rain”, nia apresia.
Iha sorin seluk, Segundu Koordenadór Asosiasaun Juventude Profísionál Xineza iha Timor-Leste, Rudy Kwan apresia CIGC nia esforsu hodi kombate COVID-19 iha Timor-Leste.
“Ami hakarak hato’o agradese no obrigadu ba esforsu tomak Sentru Integradu nian, tanba bele kombate Coronavírus iha Timor-Leste. Ami-nia asosiasaun hakarak fó apoia oituan, maski daudaun Timor-Leste la rejista ona moras COVID-19 maibé presiza nafatin halo prevensaun ne’e importante tebes, tanba ne’e maka ami hakarak fó apoia sasán oituan hodi bele ajuda halo prevensaun ba moras ne’e”, dehan Rudy Kwan.
Entretantu ekipamentu sira ne’e entrega husi Prezidente Asosiasaun, Chen Xian no simu direta husi Segundu Komandante GIGC, Bigadeiru Jenerál Aluc inklui ekipa GIGC.
Jornalista: Antónia Gusmão
Editora: Julia Chatarina
