DILI, 04 juñu 2020 (TATOLI) – Primeiru Ministru (PM), Taur Matan Ruak konvoka reuniaun ho Unidade Planeamentu, Monitorizasaun no Avaliasaun (UMPA), ne’ebé tutela ba Gabinete Primeiru-Ministru hodi rona aprezentasaun vizaun Governu iha tinan-2020.
“Reuniaun tékniku ho Primeiru-Ministru hodi halo aprezentasaun kona-ba programa, planu no sub-programa inklui atividade ne’ebé Governu sei implementa. Programa prioridade maihusi Governu no tékniku sira, ne’ebé halo mapamentu ka ajustamentu katak iha tinan-2020 ne’e programa prioridade ne’ebé atu trasa maka rekuperasaun ekonómiku,” informa Koordenadora UPMA, Brígida Soares, hafoin enkontru ho Xefe Governu iha Palásiu Governu, kuarta ne’e.
Brígida haktuir, iha enkontru ne’e programa ne’ebé mak aprezenta ba Primeiru-Ministru husi instrusuan ne’ebé iha tinan ne’e foku liu ba normalizasaun ekonomia.
PM Taur informa ba Prezidente Repúblika, Francisco Guterres ‘Lú Olo’, hodi autoriza eis Ministru Planeamentu no Finansa iha VII Governu Konstitusionál, Rui Gomes atu lidera ekipa rekuperasaun ekonómika rai-laran.
Nune’e mós, iha mensajen Prezidente Repúblika iha selebrasaun Restaurasaun Independénsia ba dala-18 iha loron 20 maiu foin lalais, hateten katak liuhosi Estadu Emerjénsia liga ho situasaun COVID-19, Governu konsege salva povu nia vida, maibé iha tempu hanesan ekonomia la buras.
Xefe Estadu nota, ekonomia tun tanba fatór lubun ida hanesan Orsamentu Jerál Estadu xumba iha Parlamentu Nasionál no obriga Estadu moris ho rejime duodésimu, inundasaun afeta ba uma-kain lubun ida iha kapitál no munisípiu balun, maluk balun tenke hapara sira-nia atividade fila-liman hodi bele hadook-an husi surtu globál ne’e.
Tanba ne’e, Prezidente Repúblika husu Governu tau atensaun hodi hala’o filafali ajenda reforma sosiál no ekonómika atubele hakbiit no sustenta ekonomia rai-laran hodi bele buras ba beibeik.
Antes ne’e, Governu aprezenta ona prograna prioridade lima hanesan Kapitál Sosiál, Dezenvolvimentu Ekonómiku, Hadi’a Konetividade Nasionál, Konsolidasaun no Hametin Seguransa no Relasaun Esterna no Konsolidasaun inklui Hametin Justisa, Demokrasia no Direitu Umanu.
Totál porsentu 28,4 husi proposta orsamentu 2020 sei aloka ba ministériu no instituisaun sira iha setór Kapitál Sosiál ho ninia distribuisaun porsentu 9,5 ba edukasaun, porsentu 13 ba protesaun sosiál no porsentu 7,3 ba saúde.
Programa no medida foun sira hosi Kapitál Sosiál inklui halo uma ba veteranu, investimentu iha bee no saneamentu, konstrusaun sentru no postu saúde, konstrusaun torre transmisaun ba televizaun, sosa ambulánsia, konstrusaun eskola no sala aula no kontribuisaun ba seguransa sosiál.
Programa daruak mak dezenvolvimentu ekonómiku, investe iha ekonomia no finansa públika iha setór ida-ne’e maka atu fasilita investimentu setór privadu, kriasaun kampu serbisu no suporta setór agrikultura, expo Dubai, subsídiu ba grupu kooperativa no subsídiu grupu feto iha área rurál.
Programa datoluk maka hadi’a Konetividade Nasionál mak hanesan infraestrutura no lojístika, sosa ró Nakroman II no provizaun serbisu foun ba aviasaun sivíl.
Programa dahaat mak konsolidasaun no hametin defeza, seguransa, no relasaun esterna mak hanesan suporta polísia komunitária, suporta polísia fronteira, sosa ró patrullamentu hodi proteje fronteira marítima Timor-Leste nian.
Programa dalimak mak konsolidasaun no hametin justisa, demokrasia no direitu umanu iha Timor-Leste.
Jornalista: Florêncio Miranda Ximenes
Editora: Julia Chatarina
