DILI, 05 juñu 2020 (TATOLI) – Xefe Suku Bauro, Postu Administrativu Lospalos, Munisípiu Lautém, Cidálio Freitas, informa benefisiáriu ba subsídiu uma-kain iha suku ne’e hamutuk 794, ne’ebé aprovadu ona atu hetan pagamentu husi Estadu.
Governu liuhosi Ministériu Solidaridade Sosiál no Inkluzaun (MSSI) lansa ona kalendáriu pagamentu subsídiu ba kada uma-kain $200 ba fulan-rua nian, ne’ebé sei realiza simultaniamente iha munisípiu 12 durante loron-tolu hahú loron 08 to’o 10 juñu.
“Iha suku ne’e lista aprovadu mak totál uma-kain hamutuk 794 mak sei simu subsídiu husi Governu durante períodu Estadu Emerjénsia,” tenik Líder Komunitáriu ne’e ba Agência Tatoli via telefónika, sesta ne’e.
Ho nune’e, Cidálio Freitas dehan nu’udar autoridade lokál nia parte prepara ona ekipa no prontu koopera ho ekipa tékniku MSSI no Banku Nasionál Komérsiu Timor-Leste (BNCTL, sigla portugés) atu halo pagamentu ho susesu iha suku.
“Ami simu ona kalendáriu pagamentu katak iha loron 9 fulan ne’e hahú pagamentu ba uma-kain iha suku ne’e, tanba ne’e BNCTL hahú halo ona tranferénsia osan ba konta bankária suku,” nia akresenta.
Autoridade lokál ne’e informa, parte suku mós prepara ona ekipa ida kompostu husi Xefe Suku, Xefe Aldeia, hamutuk ho Ofisiál Polísia Suku (OPS) atu hamutuk ho ekipa nasionál asegura pagamentu subsídiu ba uma-kain sira.
Nia apela ba komunidade bainhira simu ona subsídiu uza ba nesesidade uma-laran durante implementasaun Estadu Emerjénsia.
Apoiu monetáriu ba faze dahuluk hamutuk benefisiáriu uma-kain 298.119 iha munsípiu 12 la inklui Rejiaun Administrativa Espesiál Oé-cusse Ambeno (RAEOA), ne’ebé korresponde ho orsamentu hamutuk $59,623,800, ba pagamentu kada uma-kain $200.
Jornalista: Florêncio Miranda Ximenes
Editora: Julia Chatarina
