AILEU, 07 juñu 2020 (TATOLI) – Bazeia ba Rezolusaun Konsellu Ministru númeru 24/2013, fó dalan ba Sekretaria Estadu ba Polítika Formasaun Profisionál no Empregu (SEPFOPE) atu implementa programa no hasa’e númeru empregu iha rai-laran, nune’e implementa ona programa turizmu komunitária iha fatin lima.
Fatin hirak ne’e maka hanesan Com iha Munisípiu Lautém, Mota Bandeira iha Munisípiu Ermera, Bee Manas Marobo iha Munisípiu Bobonaro, Rekiraka iha Munisípiu Viqueque no Seloi Kraik iha Munisípiu Aileu, maibé oras ne’e fatin hirak ne’e balun abandonadu, inklui Seloi Kraik.
Tuir Xefe Suku Seloi Kraik, Gabriel Mendonça, turizmu komunitáriu ne’ebé konstrui husi SEPFOPE, iha suku Seloi Kraik, Postu Administrativu Aileu, Munisípiu Aileu, daudaun ne’e abandonadu, maski fatin ne’e estratéjia ba turizmu tanba besik lagoa.
“Fasilidade ne’ebé maka Governu halo ho osan boot maibé to’o agora abandonadu. Materiál sira komesa aat daudaun, liuliu janela no odamatan sira hahú aat,” dehan Líder Komunitáriu ne’e ba Agência Tatoli, iha sede suku Seloi Kraik, domingu ne’e.
Fatin turizmu komunitáriu ne’e, Governu hahú observa iha tinan-2012 iha tempu IV Governu no hahú kontrui iha tempu V Governu iha 2015.
Kompañia ne’ebé maka toma konta ba obra ne’e husi kompañia lokál Aileu, ERBEA Unipesoál,Lda ho orsamentu $200.000 resin.
“Sira konstrui hahú husi 2015 iha tempu Sekretáriu Estadu Ilídio Ximenes nia mandatu. Momentu ne’ebá akompaña husi Xefe Suku antigu Seloi kraik hodi hahú kontrui iha 2012 to’o 2015 la hotu no foin hotu iha 2017. Kontrusaun iha tinan-lima nia-laran,” haktuir Gabriel.
Nia informa, hafoin kontrusaun ba uma hirak ne’e ramata iha 2017, Governu la entrega ba líder komunitáriu maibé entrega ba administradór postu.
“Entaun to’o agora fatin ne’e abandonadu, gasta osan Estadu no povu nian. Momentu ne’ebá SEPFOPE la entrega ba ami. Administradór sira dehan tenke tau-matan ba fatin turizmu ne’e, ami haree duni maibé iha tempu kalan ami labele kontrola tanba la tau pesoál seguransa ruma iha ne’ebá, ida-ne’e maka sai preokupasaun,” nia lamenta.
Gabriel konsidera abandonadu tanba fasilidade hanesan bee laiha no fatin ne’e admimistrasaun postu no administrasaun munisípiu la kria kondisaun hanesan tau ema ida ne’ebé bele tau-matan iha fatin ne’e atu bele kontrola.
“Momentu féria boot, fatin ne’e abandonadu hela entaun ema soe fo’er arbiru, liuliu ba haris-fatin ne’ebé maka bee laiha no agora nia kondisaun aat no grave tebes,” nia akresenta.
Autoridade Suku ne’e konta tuir, dalaruma iha ema maka mai husu atu uza fatin ne’e atu hala’o atividade ruma maibé nia rasik labele foti desizaun.
Tanba ne’e, nia parte rekomenda ba Governu liuhosi SEPFOPE hodi bele kontinua tau-atensaun hodi halo manutensaun filafali no bele entrega ba Autoridade Suku Seloi Kraik hanesan responsável ba fatin ne’e.
“SEPFOPE entrega ba Autoridade Postu no Munisípiu, maibé autoridade rua ne’e la fó podér ba ami hanesan líder komunitáriu atu halo kontrolu. Sira mós la kria kondisaun ruma hanesan tau netik guarda rua ka haat iha ne’ebá atu halo kontrolu ba fasilidade sira ne’ebé maka iha,” nia subliña.
Ba kestaun ne’e, Agência Tatoli tenta kontaktu Administradór Munisípiu Aileu, João Tilman, maibé seidauk disponível responde tanba okupadu ho servisu.
Jornalista: Natalino Costa
Editora: Julia Chatarina
