DILI, 08 juñu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten iha diretór balun ho saláriu $501 mak naran sai iha lista pagamentu katak atu di’ak liu lalika simu tanba loron ruma sei hasoru fali lei.
Notísia Relevante: Ohin, Ekipa Pagamentu Subsídiu $200 Dezloka ba Munisípiu
“Ha’u dehan tiha ona ba diretór ba ne’ebé mak naran sai iha pagamentu katak labele simu. Se simu mak aban bainrua imi sei hasoru lei. Tanba ne’e husu atu retira tiha de’it, husik ema seluk ne’ebé mak presiza mak simu,” dehan Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, via telefonika ba Ajénsia TATOLI, segunda ne’e.
Nia hatutan, osan hirak ne’ebé mak ema la simu sei hatama hikas ba kofre Estadu. Bainhira pagamentu finaliza mak xefe suku no ekipa pagamentu sira atu tuur hamutuk obrigatoriamente hodi lori fila osan refere ba kofre Estadu.
“Sistema garantidu tanba ha’u monitoriza loro-loron katak sira sei la book buat ruma bainhira buat ruma akontese ba osan ne’e. Bainhira sira book osan, ha’u nota kedas tanba sistema estabelesidu hela,” diretór ne’e hateten.
Nia hateten, ba benefisiária sira ne’ebé mak rendimentu $500 bele simu miabé karik $500 sente boot ona no sufisiénte ona ba nia nesesidade mak di’ak liu kontibui ba Estadu no ba ema sira ne’ebé mak kbiit laek duni.
Ezemplu, nia dehan, familía uma-laran hanesan mane (katuas-oan) MAK nia saláriu $300 no feto (ferik-oan) nia saláriu $300 ne’ebé mak soma hamutuk $600, di’ak liu lalika simu tanba sistema mak la deteta. Tanba ne’e, husu onestidade no konsiénsia kada ema ida-nian atu kontribui.
Loloos, nia esplika, rendimentu família liu $500 ka $501 mak labele simu subsídiu $200 hosi Governu. Maibé benefisiáriu balun mak saláriu liu $500 mak nia naran sai nafatin, parese xefe suku sira mak la anexa kartaun eleitorál, nune’e sistema labele deteta.
“Xefe suku sira mak la hatama ka la anexa kartaun eleitorál ba dadus subsídiu uma-kain ne’e mak ita-nia sistema labele deteta benefisiáriu sira nia saláriu liu $500. Karik, ida-ne’e akontese presiza ema ida-idak nia konsiénsia. Di’ak liu labele simu tanba rendiementu $500 ka 4$501,” nia hateten.
Jornalista : Osória Marques
Editór : Cancio Ximenes
