DILI, 08 juñu 2020 (TATOLI) – Diretór Ezekutivu Fórum Organizasaun Naun Govermentál Timor-Leste (FONGTIL), Daniel Santos do Carmo, hateten tuir observasaun sosiedade sivíl ne’e, infraestrutura eskola sira iha territóriu Timor-Leste seidauk iha kondisaun atu re-ativa hikas eskola sira, maski kumpre rekomendasaun sira husi Organizasaun Saúde Mundiál (OMS) no Ministériu Saúde (MS) atu prevene COVID-19 iha Timor-Leste.
“Ami-nia haree katak atu loke eskola ka re-ativa eskola tenke kumpre rekomendasaun sira maihusi Organizasaun Mundiál, maibé ita-nia eskola sira laiha espasu tanba akumula estudante 40-resin iha sala aula ida, oinsá maka atu garante distansimanetu fíziku no sosiál iha eskola sira bainhira re-ativa eskola,” tenik Diretór sosiedade sivíl ne’e iha ninia knaar fatin, Caicoli, segunda ne’e.
FONGTIL hala’o ona monitorizasuan ba eskola sira iha territóriu laran katak eskola barak laiha bee no saneamentu.
“Ami haree eskola hotu iha Timór laran tomak kuaze laiha bee no sameamentu, liuliu sentina a’at hotu no bee laiha, oinsá maka atu garante estudante sira bele fase liman,” nia kestiona.
Nune’e, nia sujere ba Governu atu suspende ka labele re-ativa lai eskola sira, maibé presiza investe iha setór edukasaun liuliu prepara kondisaun sanitáriu hodi bele garante kondisaun maka foin bele loke eskola.
“Ita haree situasaun frájil loos iha ita-nia fronteira sira katak surtu ne’e sei la’o hela no ita laheten bainhira mak hotu,”nia akresenta.
Antes ne’e, Governu liuhosi reuniaun Konsellu Ministru aprova medidas Estadu Emerjénsia faze datoluk ne’ebé fó biban ba eskola sira hodi re-ativa hikas, hafoin suspende durante fulan-rua.
MS aprova ona pedidu Ministériu Edukasaun, Juventude no Desportu (MEJD) atu re-ativa eskola sira hotu, maibe tenke prepara no garante sanitáriu, distánsia fíziku no prepara fasilidade hodi estudante sira bele fase liman bebeik.
Ekipa MS no MEJD hahú inspesaun ba kada eskola sira atu garante sanitáriu maibé seidauk deside loron ba prosesu aprendizajen eskola ho normál iha territóriu laran.
Jornalista: Florêncio Miranda Ximenes
Editora: Julia Chatarina
