DILI, 09 juñu 2020 (TATOLI)–Prezidente Autoridade Munisípiu Dili, Gaspar Soares, hatete prosesu pagamentu lori tempu naruk maibé ohin loron benefisiáriu sira sente kontente tanba prosesu pagamentu ida-ne’e, to’o ona tempu ona atu ema ida-idak bele simu ninia direitu.
Notísia Relevante: Governu Halo Abertura Ba Pagamentu Subsidiu $200 iha Sede Suku Comoro
Tanba ne’e, nia husu atu prosesu pagamentu subsídiu $200 ne’e la’o ho susesu, eipa seguransa hamutuk ho autoridade komunitáriu sira atu hamatan ba prosesu ne’e tomak to’o nia rohan.
“Ho ida ne’e, ha’u husu hakraik-aan ba ita hotu katak atu sé mak elizivél bele simu osan ona no sé mak la elizivél labele simu osan ida-ne’e. Husu ba seguransa no xefe suku sira atu tau matan ba prosesu pagamentu ne’e tomak to’o susesu. Ha’u espera katak hotu-hotu iha ne’e elizivél hotu maibé karik entre ita-boot sira balun mak sente ladi’ak elizivél entaun husu para hakat ba iha meza reklamasaun,” dehan Gaspar Soares ba jornalista sira hafoin akompaña Vise Primeiru-Ministru, Armanda Berta dos Santos, iha serimónia Governu halo abertura ba pagamentu subsídiu $200 iha Sede Suku Comoro, Dili, tersa ne’e.
Nia fó hanoin, meza primeiru sei haree ita-boot sira-nia lista naran katak elizivél ka la’e atu simu osan subsídiu ne’e. Bainhira Xefe Aldeia mak haree lista naran mak laiha, konserteza sei lasimu osan. Nune’e, husu la elizivél di’ak liu ba iha meza terseiru nian hodi halo reklamasaun.
“Sé mak ba haree naran laiha ka la eliziél atu simu subsídiu $200 ne’e, hakat hakbesik ba meza terseiru nian atu halo reklamasaun. Hafoin ne’e, xefe suku sei hato’o reklamasaun ne’e ba ministériu kompetente, tanba sei faze daruak ba selu subsídiu $200 ne’e,” nia hateten.
Notísia Relevante: Governu Aloka Osan Millaun $1-Resin ba Suku Comoro
Jornalista : Osória Marques
Editór : Cancio Ximenes
