DILI, 09 juñu (TATOLI)–Governu liuhosi Vise Promeiru-Ministru Asuntu Solidaridade Sosiál no Inkluzaun, Armanda Berta dos Santos, ohin, halo abertura ba pagamentu subsidiu $200 iha Sede Suku Comoro, Postu Administrativu Dom Aleixo, Munisípiu Dili.
Notísia Relevante: Governu Benefísia Uma-Kain 298.119 iha Munisípiu 12
Vise Primeiru-Ministru ne’e hateten, sente kontente hodi akompaña komunidade sira ne’ebé mak hein hela nia direitu ba situasaun Estadu Emerjénsia ba COVID-19 nian iha sede Suku Comoro nian.
“Ha’u kontente tebes mai iha ita-boot sira-nia leet. Buat ne’ebé mak durante Estadu Emerjénsia, ita hotu akompaña liuliu ba ha’u-nia komunidade sira ne’ebé mak hein nia direitu ne’ebé fó sai ona ohin (09/06/2020) katak $100 dolár sei to’o iha ita-boot sira,” dehan Vise Promeiru-Ministru Asuntu Solidaridade Sosiál no Inkluzaun, Armanda Berta dos Santos, ba jornalista sira iha sede Suku Comoro, Dili, tersa ne’e.
Armanda Berta informa, pagamentu la’ós de’it iha Munisípiu Dili maibé teritóriu Timor-Leste tomak ne’ebé mak ohin simu ona pagamentu subsídiu uma-kain ne’e.
“Tanba ne’e, ekipa hotu tún hotu ba iha terrenu hodi akompaña pagamentu. Ohin, ha’u mai iha imi-nia leet hodi haree direta imi-nia kondisaun ba durante Estadu Emerjénsia ba COVID-19 nian. Katak, ohin, imi bele simu ona imi-nia direitu ba fulan rua nian hamutuk $200,” nia haktuir.
Nia dehan, parese sei kleur maibé pasiénsia uitoan no husu hotu-hotu nia kolaborasaun hodi servisu hamutuk hodi haree ba oin. Tanba ne’e, Governu liuhosi MSSI mós iha inisiativa hodi haree situasaun refere.
Governante ne’e husu ba benefisiáriu balun ne’ebé mak karik naran la sai ka la’ós elizivél, presisa kolabora hamutuk ho MSSI, Ministériu administrasaun Estatal (MAE) inklui autoridade komunitáriu no Munisípiu no mós parte seguransa nian, atu halo ba iha meza reklamasaun nian hodi reklama ninia direitu.
Notísia Relevante: Komunidade 80% Laiha Konta Bankaria, BNCTL Labele Halo Pagamentu Direta
Jornalista : Osória Marques
Editór : Cancio Ximenes
