DILI, 12 juñu 2020 (TATOLI)–Governu liuhosi Ministériu Solidaridade Sosiál no Inkluzaun (MSSI) esforsu atu iha loron 14 nia laran ne’e bele finaliza ona pagamentu subsídiu $200 ba agregadu familiar iha territóriu Timor-Leste.
Notísia Relevante: Pagamentu Loron Daruak, Totál Reklamasaun Hamutuk 1.339
“Ita esforsu atu iha loron 14 nia laran, finaliza ona pagamentu subsídiu $200 iha territóriu Timor-Leste,” dehan Diretór Jerál MSSI, Rui Manuel Gago Exposto, ba jornalista sira iha salaun MSSI, Caicoli, Dili, kinta ne’e.
Diretór ne’e hateten, se to’o loron termina ne’e mak pagamentu seidauk bele ramata, ekipa pagamentu nafatin aselera hodi hakotu tiha pagamentu iha loron 14 nia laran.
Ezemplu, nia informa, iha suku balun iha Kapitál Dili komunidade barak mak demora iha prosesu pagamentu tanba ekipa ida de’it mak atende sira.
“Loos duni. Ha’u nota iha Suku Comoro, Becora, Fatuhada, Bairru Pité ne’ebé mak ema barak tebes maibé ekipa ida de’it mak demora iha prosesu pagamentu. Maibé ha’u antesipada ho ida-ne’e no ha’u fó ona orientasaun ba ha’u-nia diretór sira iha Munisípiu katak bainhira ekipa pagamentu ida mak finaliza nia relatóriu, hodi ekipa pagamentu suporta fali suku seluk ne’ebé seidauk hotu,” nia hateten.
Tuir kalendáriu trasa ona, sei finaliza pagamentu iha loron 14 nia laran. Bainhira la ramata tenke kontinua tanba pagamentu la’ós hala’o to’o ramata maibé tenke finaliza pagamentu.
“Bainhira la hotu, ita kontinua to’o finaliza pagamentu ne’e. Kalendáriu hanesan tentativa hodi implementa ita-nia programa. Maibé ita hakarak iha loron 10-14 nia laran, ita tenke finaliza tuir ita-nia tarjetu. Tanba ita iha ekipa ne’ebé sei suporta malu bainhira suku seluk finaliza nia relatóriu,” nia dehan.
Notísia Relevante: Saláriu $500 Bele Simu Subsídiu Tanba Hakerek Nanis Ona iha Dekretu-Lei
Jornalista : Osória Marques
Editór : Cancio Ximenes
