DILI, 13 juñu 2020 (TATOLI)-Arsebispu Arkedioseze Metropolitana Dili, Dom Virgílio do Carmo da Silva, SDB, husu ba Sarani Parókia Santo António Motael Dili atu sai masin no naroman bae ma seluk.
Lider Sarani Katólika Dioseze Dili hato’o mensajen ne’e durante prezide misa aniversáriu Padrueiru Santo António ne’ebé sai mahein ba Parókia Santo António Motael Dili.
“Imi mak masin no roman mundu nian tanba loron ohin ita selebra mahein Santu Antóniu hodi fó grasa di’ak ba ita idaidak,” katak Dom Virgílio iha Motael Dili, ohin.
Santu António durante sei kiik dedika ninia vida tomak ba serbí igreja.Nia husu atu sarani hotu-hotu banati tuir mahein Santu António nian maka buka atu hanorin loloos ukun fuan Maromak nian no moris ho Eukaristia.
“Prezensa reál iha Jesus-nia Eukaristia hatan ba iha dutrina hirak ne’e iha Santu António nia liafuan hanesan ai-han ba Jesus-nia eskolante sira no iha vida ispirituál ne’e ita hetan grasa wa’in Santu António nian tanba ne’e husu ba sarani hakbesik an ba iha santa kreda,” nia apela.
Misa selebrasaun Padrueiru Santu António iha Motael, ohin partisipa másimu husi sarani katólika no relijiozu, relijioza no hetan seguransa husi Polisia Nasionál Timor-Leste.
Jornalista : Felicidade Ximenes
Editór : Agapito dos Santos
