DILI, 16 juñu 2020 (TATOLI) – Bazeia ba avaliasaun no monitorizasaun husi ekipa Sekretaria Estadu Ambiente (SEA) ba implementasaun polítika zero plástiku iha supermerkadu no loja hamutuk 17 iha Kapitál Dili, hatudu katak supermerkadu hitu hahú inísiu to’o ohin kontinua uza saku orgániku.
”Ami kontente halo avaliasaun ba supermerkadu no loja sira hamutuk 17 iha Dili laran, maibé supermerkadu hitu mak ami halo apresisaun pozitivu tebes tanba sira distribui husi inísiu promosaun zero plástiku ne’e to’o ohin loron,” tenik Sekretáriu Estadu Demétrio ba Agência Tatoli, iha ninia kna’ar fatin, edifísiu Akait, tersa ne’e.
Notísia Relevante: SEA-Heineken Asina “Saku Ida Ai-hun Ida”
HEINEKEN Entrega Saku Verde Husi Ai-Farina Hamutuk 5000 Ba SEA
Supermerkadu hitu ne’e maka hanesan W-Four, Dili Mart, Kmanek Supermerkadu, Leader, Centro Supermerkadu, Lita Store no Mey Mart Fatuhada, ne’ebé balun uza ona saku orgániku tonelada 20 to’o 2.000, ne’ebé prodús husi kompañia Heineken Timor-Leste.
“Ita atribui ona sertifikadu apresiasaun ba supermerkadu hitu ne’e tanba sira-nia kontribuisaun pozitivu ba apoia polítika zero plástiku husi Governu,” Sekretáriu Estadu ne’e apresia.
Ho nune’e, Sekretáriu Estadu ne’e dehan sei kontinua halo inspesaun ba supermerkadu no loja sira atubele tama hotu ba sistema ka polítika zero plástiku hodi uza saku orgániku.
“Atu muda ema nia atitude la fásil, maibé ha’u kontente tanba iha Timor-Leste konsege konvense empreza Caltceh no hetan apoia husi Mercy Corps inklui Heineken hosi halo resiklajen plástiku ba materiál konstrusaun ho naran paving,” nia subliña.
Iha loron 30 janeiru 2019, Governu liuhosi reuniaun Konsellu Ministru aprova rezolusaun ba polítika zero plástiku hodi halo redusaun ba utilizasaun kímiku.
Iniasiativa hamosu polítika ne’e tanba konsidera polusaun ne’ebé mosu provoka husi utilizasaun produtu kímiku nu’udar dezafíu prinsipál ba umanidade no ambiente.
Polítika ne’e define atu bandu no regulariza utilizasaun plástiku kímiku iha fatin servisu.
Antes ne’e, SEA hamutuk ho kompañia Heineken Timor-Leste asina nota entendimentu hodi prodús ‘Saku Ida Ai-hun Ida’, ne’ebé distribui iha supermerkadu no loja sira.
Kompañia Heineken hahú entrega saku verde hamutuk 5.000 ho matéria ai-farina ba SEA hodi distribui ba supermerkadu, loja no kioske sira hodi fahe ba konsumidór atubele utiliza filafali bainhira sira ba sosa sasán.
Jornalista: Florêncio Miranda Ximenes
Editora: Julia Chatarina
