DILI, 20 juñu 2020 (TATOLI)- Asidente tráfegu ne’ebé akontese iha área kruzamentu One Dollar Beach (ODB), Suku Fatumeta, Postu Administrativu Laclo, Munisípiu Manatuto, sábadu ne’e, rezulta joven mane na’in-rua liman-ain tohar inklui motor ne’ebé sira nain-rua kondús rahun total.
Asidente tráfegu ne’e akontese tanba suspeitu ne’ebé kondús karreta Triton Mitsubishi ho númeru polísia ka matrikula A.14290 ho motor Honda Beat ho matrikula M. 4376 halai ho velosidade.
Komandante Polísia Munisípiu Dili, Superintendente Xefe Armando Monteiro, dehan parte polísia halo ona detensaun ba suspeitu ho inisiál AB ne’ebé kondús karreta Triton kór metan no identifika vítima na’in-rua kanek todan tanba entre sira ne’e liman-ain tohar.
PNTL Munisípiu Dili liuhosi Eskuadra Polísia Metinaro halo ona detensaun ba suspeitu lori mai sela Polísia Caicoli, Dili, hodi submete ba prosesu investigasaun no sei entrega fali ba Komandu PNTL Manatuto.
Armando dehan, kazu ne’e akontese iha área jurizdisaun Munisípiu Manatuto nian, tanba ne’e nia parte seidauk bele fó sai klaru identidade suspeitu inklui vítima na’in-rua ne’ebé oras ne’e hala’o hela tratamentu intensivu iha Ospitál Nasionál Guido Valadares (HNGV), Dili.
“Kronolojia ne’e akontese tanba problema transporte rua halai velosidade. perigoza halai maka’as, motór husi Dili atu ba Manufahi no karreta mai husi parte leste atu tun ba iha área One Dollar Beach,” haktuir Armando Monteiro ba Agência Tatoli.
Nia hatutan, parte PNTL Manatuto maka sei halo prosesu investigasaun kle’an ba asidente tráfegu ne’e.
Iha parte seluk, Komandante Polísia Munisípiu Manatuto, Superintendente, Júlia da Gama, via telefone, informa katak, sira-nia parte halo ona koordenasaun ho Komandu PNTL Dili para halo investigasaun ba suspeitu hodi entrega hikas ba Komandu Manatuto.
Nia hatutan, PNTL Manatuto rasik halo ona investigasaun ba kazu ne’e iha terrenu, maibé seidauk bele fó sai identidade loloos husi vítima na’in-rua ne’ebé kanek.
“Suspeitu ami identifika ho inisiál AB (tinan 46), maibé vítima na’in-rua ne’ebé kanek, ha’u seidauk bele ko’alia kona-ba ninia kronolojia, tanba sein halo investigasaun kle’an no hein koordenasaun ho Komandu PNTL Dili para entrega suspeitu mai ami,” hateten komandante Julia Gama.
Komandante Julia rasik koordena ona ho ekipa investigasaun PNTL Dili hodi aprezenta relatóriu kona-ba suspeitu ne’ebé iha ona detensaun.
Jornalista : Eugénio Pereira
Editór : Francisco Simões
