DILI, 22 juñu 2020 (TATOLI)-Xefe Departementu Saúde Ambientál Ministériu Saúde, José Moniz, relata tuir dadus husi Servisu Vijilánsia Epidemiolójia Nasionál rejista hahú husi fulan-janeiru to’o meadu juñu ne’e rejista ona pasiente ho moras dengue hamutuk rihun ida resin no konsege hamate ema na’in 10.
Munisípiu tolu hanesan Dili, Ermera no Munisípiu Liquiça mak risku ba kazu dengue tanba tuir dadus númeru aumenta maka’as hafoin maka munisípiu hitu seluk inklui Rejiaun Administrativa Espesiál Oé-Cusse Ambeno (RAEOA).
Notísia Relevante:MS Laiha Estoke Ai-Moruk Kímiku Hodi Rega Susuk
“Durante ne’e ha’u informa ona ba Ministra Saúde kona-ba kazu dengue ne’ebé mak nafatin aas iha ita-nia rain tanba semana kotuk liubá iha sia de’it maibé agora daudaun sa’e ba na’in 10 mak mate no ami husi nasionáll mós fó apoiu ona ba Munisípiu ne’ebé mak iha risku,”dehan José Moniz ba TATOLI, iha ninia servisu fatin, ohin.
Kazu dengue ne’e mosu tanba komunidade moris iha ambiente ida la seguru ka fo’er.
“Ministériu Saúde iha ona planu para oinsá halo asaun ida ne’ebé mak maka’as tan atu prevene tanba haree mós iha mudansa klimátika nian hanesan udan mós la para no kazu ne’e sei sa’e banhira komunidade nia ambeinte la saudavel,” tenik Xefe Departementu ne’e.
Problema ba Ministériu Saúde maka daudaun ne’e laiha estoke ai-moruk abate nian hodi rega susuk.
“Ita-nia estoke abate husi Munisípiu Dili iha maibé husi Nasionál laiha ona no ami halo ona rekomendasaun para sosa filafali ai-moruk abate ida ne’e,” nia esplika.
jornalista : Felicidade Ximenes
Editór : Agapito dos Santos
