iklan

NASIONÁL, HEADLINE, POLÍTIKA

Ministériu Públiku Pro ba Lei Kriminaliza Difamasaun

Ministériu Públiku Pro ba Lei Kriminaliza Difamasaun

Prokurafor Jeral da Republika, Jose Ximenes.Imajen/ António Gonçalves

DILI, 29 juñu 2020 (TATOLI)–Prokuradór Jerál Repúblika (PJR), José da Costa Ximenes hateten, Ministériu Públiku (MP) pro ka apoia katak presiza iha Lei Kriminaliza Difamasaun tanba presiza iha liberdade espresaun ne’ebé ho responsabilidade bazeia ba Konstituisaun Repúblika Demokrátika Timor-Leste (K-RDTL).

“Ha’u hakarak atu aproveita situasaun ida ne’e hodi hato’o opiniaun ne’ebé barak kona-ba difamasaun injúria ne’ebé mak sai iha públiku. Ha’u gosta tebe-tebes tanba sosiedade Timor liuliu sosiedade sivíl, hahú tau ida-ne’e hanesan kestaun ida-ne’ebé bele sai hanesan debate públiku. Balun pro no balun kontra. Entaun, oinsá Prokuradór Jerál Repúblika ninia pozisaun, ha’u pro ba lei difamasaun injúria,” dehan José Ximenes hafoin hala’o enkontru regulár ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pité, Dili, segunda ne’e. 

Prokuradór ne’e pró ba Lei Kriminaliza Difamasaun, tanba iha razaun simples de’it mak bazeia ba konstotuisaun RDTL artigu Primeiru númeru 1 ne’ebé dehan, Republika Demokratika de Timor Leste nu’udár esatdu direitu demokrátiku, soberanu, independente, no unitáriu ne’ebé harii hosi povu nia vontade no respeita ba dignidade pesoa umana.

Alende ne’e, nia hatutan, iha artigu 36 ko’alia kona-ba direitu ba onra no ba privasidade, ne’e dehan sidadaun hotu, ema ida-idak iha direitu ba nia onra, direitu ba ninia naran di’ak no reputasaun, nu’udár direitu fundamentál ne’ebé konsagra iha konstituisaun. Tanba ne’e, labele uza liberdade espresaun atu limita no bele difama ema.

“Matéria ne’ebé mak ita tenke lori ba diskute maka ne’e, bele ka lae ha’u uza ha’u-nia direitu ba liberdade atu difama ema. Entaun ezije saida mak ha’u-nia liberdade hosi artigu 40 no 41, liberdade ho responsabilidade. Ita labele dehan ha’u-nia liberdade no ha’u bele tolok ema. Tanba ida-ne’e kontra ema seluk ninia liberdade,” nia esplika.

Nia hateten, nia gosta sosiedade sivíl atu hato’o sira-nia opiniaun maibé sira ne’ebé servisu iha instituisaun estadu balun fó komentáriu ne’ebé servisu iha kargu públiku ne’ebé la konkorda ba Lei Kriminaliza Difamasaun ne’e.

“Ha’u dehan, ita labele a-favór ba sosiedade sivíl. Tanba sosiedade sivíl ninia papél atu halo krítika duni. Ita labele a-fovór ba sosiedade sivíl hodi ignora direitu fundamentál sidadaun nian,” nia apela.

Antes ne’e, Primeiru Ministru (PM), Taur Matan Ruak hateten, Governu fó tempu ba sosiedade atu halo diskusaun ba esbosu lei Difamasaun no seidauk aprezenta ba Konsellu Ministru (KM).

Notísia Relevante: PM Taur Fó Tempu ba Sosiedade Diskute Lei Kriminaliza Difamasaun

Jornalista : Cipriano Colo

Editór       :  Cancio Ximenes

iklan
iklan

Leave a Reply

iklan
error: Content is protected !!