DILI, 01 jullu 2020 (TATOLI)-Ministériu Edukasaun Juventude no Desportu (MEJD) mak sai benefisiáriu ba orsamentu millaun $ ida ne’ebé apoiu husi Nova Zelándia hodi prevene no kombate surtu COVID-19 iha Timor-Leste.
Ministru Edukasaun Juventude no Desportu, Armindo Maia, hateten Ministériu sei uza montante orsamentu millaun $ ida ne’e hodi sosa ekipamentu prevensaun no metigasaun para distribui ba estudante pre-eskolár sira iha Territóriu Timor-Leste.
Notísia Relevante: Nova Zelándia Apoiu Millaun Ida ba TL Prevene COVID-19
“Ami hatene ona atu utiliza osan ne’e tanba ami identifika ona nesesidade saida mak sei apoiu ba eskola nivél pre-eskolár sira iha Timor Laran tomak,” dehan Governante ne’e hafoin partisipa reuniaun Konsellu Ministru iha Palacio do Governo Dili, ohin.
Notísia Relevante: MEJD ho Nova Zelándia Lansa Kampaña Prevensaun COVID-19
Maski nune’e, governante ne’e la esplika detaillu ba mídia sira kona-ba fasilidades saida nia parte sei sosa hodi distribui ba estudante pre-eskolár sira hotu.
Notísia Relevante: Nova Zelándia Apoiu Ekipamentu COVID-19 ba Governu
Governante garante ho apoiu husi doadór ne’e maka suporta Governu hodi halo prevensaun no metigasaun ba pandemia globál coronavirus.
Tanba ne’e, MEJD nafatin halo esforsu hodi kompleta ekipamentu prevensaun COVID-19 ba eskola sira hodi nune’e bele re-abertura ona prosesu aprendizajen durante semana ida ne’e.
Notísia Relevante: Nova Zelándia Apresia TL Nia Susesu Prevene COVID -19
“Ita sei kontinua loke prosesu ensinu aprendizajen fazeadamente tuir eskola idaidak ninia preparasaun, tanba ita lakohi foti risku bainhira eskola seidauk kompleta sira ninia fasilidade,”tenik Governante.
Jornalista : Tomé Amado
Editór : Agapito dos Santos
