DILI, 01 jullu 2020 (TATOLI)—Prezidente Parlamentu Nasionál, Aniceto Longuinhos Guterres LOpez, fó-sai katak serimíonia hatuur-hikas meza Parlamentu Nasionál ne’ebé rahun sei realiza iha loron Konsulta Populár, iha loron 30 agostu.
Notísia Relevante: Deputadu CNRT Baku-Fila Meza Prezidente Parlamentu Nasionál
“Ami sei ko’alia hela tanba tempu sei kleur. Ha’u informa tiha ona ba Arcebispo katak data fiksu hosi Parlamentu Nasionál nian mak dia 30 de agostu. Se laiha sirkutánsia ruma mosu impede entaun ita nafatin data ida-ne’e tanba koñesidu ho dia 30 de agostu, loron konsulta populár ka loron povu nian,” dehan Aniceto Guterres ba jornalista sira, iha Rezidensia Episkopál, Lecidere, Dili, kuarta ne’e.
Prezidente Parlamentu Nasionál, fó-sai katak, oras ne’e parte tékniku sira sei konitnua diskute programa kona-ba hatuur-hikas meza parlamentu ne’ebé rahun ne’e.
Iha opurtunidade ne’e, Prezidente Parlamentu Nasionál, esklarese situasaun parlamentu ninian iha fulan ida liubá to’o agora ba Arcebispu atuál Bispu Dioseze Dili, Dom Virgílio do Carmo da Silva.
Entretantu, Arsebispu Arkedioseze Metropolitana Dili, Dom Virgílio do Carmo da Silva, SDB, apresia preparasaun parlamentu nian hodi hatuur hikas meza ne’e maibé husu atu identifika hosi problema sira-ne’e hotu.
“Ha’u hanoin tenke buka dalan atu rezolve, buka dalan atu hadi’a no buka dalan atu hametin fila-fali. Ha’u apresia tanba prezidente parlamentu iha ona planu. Ha’u fó hatene ba sira katak ha’u kaer-metin ha’u-nia liafuan katak meza ne’e la’ós rai-lakan mak kona ka anin mak hú monu, maibé ne’e kauza ida mak provoka meza ne’e rahun. Agora tenke buka-tuir nia fukun iha-ne’ebé depois mak tau fila-fali meza ne’e,” Arsebispu Arkedioseze Metropolitana Dili, Dom Virgílio do Carmo da Silva, SDB, hateten.
Tuir Amu Bispu, Prezidente Parlamentu promete sei armoniza uluk relasaun entre bankada parlamentár sira nune’e deputadu sira bele rekoñese erru ne’ebé sira halo ona.
“Atu ba bolu ita-nia lia-na’in sira ka Amu Bispu ida ka padre ida atu fó bensaun maibé tenke halo rekonsiliasaun uluk no hadia uluk relasaun. Tanba ne’e, ha’u fó hanoin fukun tenke halo loloos no labele husik agonia hela hanesan ne’e,” Bispu Dioseze Dili ne’e fó hanoin ba Deputadu Aniceto Guetrres.
Entretantu, parte tékniku parlamentu nian oras ne’e dezeña hela serimónia kulturál no relijioza repozisaun meza Prezidénsia Parlamentu Nasionál.
Notísia Relevante: PN Sei Husu Bispu Fó Bensaun ba Meza Foun
Jornalista : Evaristo Soares Martins
Editór : Cancio Ximenes
