DILI, 4 jullu 2020 (TATOLI)-Governu liuhosi Ministru Asuntu Parlamentár no Komunikasaun Sosiál, Francisco Jerónimo, hateten Governu sei fó nafatin prioridade atu dezenvolve mídia iha Timor-Leste durante ninia mandatu tinan rua ho balun.
Nia hato’o kompromisu ne’e bainhira enssera konferénsia Asosiasaun Jornalista Timor-Leste hodi hili reprezentante hodi tuur iha estrutura Consellu Imprensa ba periodu 2020-2024 iha salaun Delta Nova, sábadu ne’e.
Nótisia Relevante :AJTL Hili Virgílio “Lamukan” Guterres Reprezenta Jornalista iha CI
“Ha’u mai atu hametin tan área jornalista nian no atu hadi’a tan ba oin saida mak ita hotu atu presiza iha parte jornalista nian ho hanoin katak Governu nafatin fó apoiu ba ita boot sira tanba ida ne’e mak ha’u nia hanoin no mós ita sei hamutuk oinsá mak ita defende funsaun jornalismu nian”, dehan Eis Deputadu husi Partidu FRETILIN ne’e.
Nótisia Relevante :PM Taur Husu Mídia Kontinua Promove Pás no Unidade Nasionál
Jornalista hala’o nia profisaun hanesan ema profesionál tanba ne’e, Governu sei esforsu hodi rekoiñese sira-nia servisu.
“Iha tan tempu tinan ida ka rua ho ha’u maibé ha’u sei halo di’ak ba jornalista Timor Leste nian tanba ida ne’e hanesan ha’u-nia kompromisu ida”, katak Governante.
Jornalista : Felicidade Ximenes
Editór : Agapito dos Santos
