DILI, 07 jullu 2020 (TATOLI) – Embaixadór Austrália ba Timor-Leste, Peter Roberts, hateten Governu Austrália hakarak kontinua kooperasaun ba dezenvolvimentu estrada rurál hamutuk Governu Timor-Leste liuhosi Programa Estrada Rurál ba Dezenvolvimentu (R4D, sigla inglés) ne’ebé daudaun la’o hela iha Timor-Leste.
Diplomata ne’e hato’o lia hirak ne’e bainhira hala’o enkontru ho Ministru Obra Públika, Salvador Eugênio dos Reis Pires, hodi ko’alia kona-ba kooperasaun entre nasaun rua.
“Ha’u bele konfirma ho Ministru atu kontinua servisu ba estrada rurál, maski sei iha situasaun Coronavírus maibé programa hanesan estrada rurál importante tebes ba komunidade iha área rurál, ba eskola, sentru saude, merkadu no mós fó oportunidade ba ema ne’ebé maka hela iha área rurál atu serbisu. Tanba ne’e, ami sente programa hanesan ne’e importante,” tenik Embaixadór Peter hafoin ramata enkontru ho Ministru Salvador iha edifísiu Ministériu Obra Públika (MOP), tersa ne’e.
Notísia Relevante: Tender 36 iha R4D Fó Oportunidade Ba Empreza Lokál
Iha loron 21 marsu, Governu Timor-Leste liuhosi MOP ho Governu Austrália estende hikas implementasaun subsidiáriu programa R4D.
Akordu estensaun ne’e ho durasaun to’o tinan 2021, ne’ebé sei aliña ho programa Governu ba tinan-haat tuir mai atu kontinua reabilita no konstrui estrada nasionál por volta kilómetru 300, estrada munisipál kilómetru 400, no estrada rurál kilómetru 500.
Kada tinan Austrália fó apoiu tékniku millaun $4 no Governu Timor-Leste prevee millaun $20 liuhosi Orsamentu Jerál Estadu (OJE) iha kapitál dezenvolvimentu ba reabilitasaun estrada rurál hodi bele implementa programa ne’e.
Totál orsamentu ne’ebé Governu Austrália prevee ona iha programa R4D hamutuk millaun AU$62, liuhusi International Labour Organization (ILO) atu fó asisténsia téknika ba dezeñu no supervizaun inklui mós kapasitasaun ba setór públiku no emprezáriu lokál.
Embaixadór ne’e konsidera, programa estrada rurál fó benefísiu ba komunidade iha área rurál liuhosi fó oportunidade serbisu ba komunidade sira hela área rurál.
“Austrália sei kontinua servisu hamutuk ho Timor-Leste liuhosi programa ne’e no sei fó apoiu tékniku no kestaun seluk,” subliña Peter Roberts.
Hahú tinan 2012, liuhosi programa R4D konsege reabilita no halo manutensaun ba estrada rurál hamutuk kilómetru 552 ne’ebé reprezenta ona porsentu 27 husi estrada rurál iha Timor-Leste.
R4D implementa husi Governu Timor-Leste liuhosi Diresaun Nasionál Estrada, Pontes no Kontrolu Cheia ih MOP, ho nia alvu mak feto ho mane sira área rurál sei hetan benefísiu sosiál no ekonómiku husi asesu estrada ne’ebé hadi’ak ona.
Jornalista: Natalino Costa
Editora: Julia Chatarina
