DILI, 07 jullu 2020 (TATOLI) – Primeiru-Ministru (PM), Taur Matan Ruak fó ona orientasaun servisu ba Vise-Ministra Turizmu Kumunitáriu no Kulturál, Inácia da Conceição Teixeira atu integra komunidade iha prosesu turizmu komunitáriu.
Antes ne’e, Governu estabelese ona turizmu komunitáriu iha fatin lima hanesan Com iha Munisípiu Lautém, Mota Bandeira iha Munisípiu Ermera, Bee Manas Marobo iha Munisípiu Bobonaro, Rekiraka iha Munisípiu Viqueque no Seloi Kraik iha Munisípiu Aileu.
“Ha’u mai hasoru Primeiru-Ministru no simu mós orientasaun servisu atu integra komunidade iha prosesu turizmu komunitáriu ninian, liuliu fatin turizmu sira ne’ebé estabelese ona,” relata Vise-Ministra Inácia hafoin ramata enkontru ho PM Taur iha Palásiu Governu, tersa ne’e.
Durante ne’e turizmu komunitáriu ne’ebé estabelese ona Governu la entrega ba líder komunitáriu maibé entrega ba administradór postu, tanba ne’e dalaruma ladún tau atensaun.
Biban ne’e, Xefe Governu orienta Vise-Ministra ne’e hodi halo koordenasaun serbisu ho Komisaun Planu Rekuperasaun Ekonomia hodi haree ba setór turizmu nian.
“Orientasaun serbisu ne’e mós Primeiru-Ministru ko’alia setór turizmu iha prosesu rekuperasaun ekonomia ligadu ho COVID-19, tanba daudaun labele halo promosaun turizmu Timór nian iha rai-liur, tanba ne’e Governu liuhosi Ministériu Turizmu Kumunitáriu no Kulturál (MTKK) presiza haree oinsá dezenvolve turizmu doméstiku nian,” Inácia akresenta.
Tuir governante ne’e, atu dezenvolve maka dahuluk presiza halo uluk planu hodi haree fatin ne’ebé iha ona bele serbisu hamutuk ho joven sira ne’ebé iha talentu hodi kapasita sira ligadu ho jestaun.
“Fiar katak ho kapasitasaun ba sira liuhosi setór privadu hanesan parseiru Governu nian, bele dezenvolve di’ak liután turizmu doméstika sira,” nia subliña.
Jornalista: Antónia Gusmão
Editora: Julia Chatarina
