DILI, 08 jullu (TATOLI)—Prezidente Komisaun G ne’ebé trata asuntu Edukasaun, Juventude, Kultura no Sidadania, Deputadu António Verdiál de Sousa, sei aprezenta proposta Klibur Instituisaun Superiór Privadu Timor-Leste (KIESP-TL) hodi hola desizaun koletiva atu lori ba iha plenária.
Notísia Relevante: KIESP-TL Hato’o Proposta Millaun $5.8 ba Parlamentu Nasionál
Prezidente Komisaun G ne’e rekoñese, kada tinan ne’e Governu prevee orsamentu ba UNTL ho montante ne’ebé boot maibé ensinu superiór sira asesu orsamentu.
“Hanesan Prezidente Komisaun G hato’o ba sira katak, ami la halo desizaun. Maibé, sira-nia halerik ne’e, ami sei konvoka tán reuniaun iha nível Komisaun G sei hola desizaun hamutuk hodi hato’o ba Prezidente Parlamentu Nasionál atu lori ba iha plenária,” António Verdiál de Sousa informa ba jornalista sira, iha Parlamentu Nasionál, kuarta ne’e.
Deputadu António Verdiál de Sousa hateten, audiénsia ho Klibur Instituisaun Superiór Privadu Timor-Leste (KIESP-TL) dahuluk ne’e importante hodi hadi’a kualidade ensinu no atu kria kondisaun di’ak.
“Ohin, Komisaun G rona sira-nia halerik katak dala ua’in ona sira hato’o karta ba iha instituisaun estadu sira liuhosi Ministériu Ensinu Superiór, Siénsia no Kultura (MESSK) maibé to’o ohin loron resposta seidauk iha. Tan ne’e mak sira mai husu tau atensaun ba proposta ho montante orsamentu millaun $5.8 ba instituisaun esinu superiór privadu iha Timor-Leste,”
Nune’e mós Komisaun G sei bolu Ministru Ensinu Superiór, Siénsia no Kultura (MESSK) ba iha Komisaun G hodi bele fahe informasaun ba-malu hodi bele hetan entendimentu di’ak kona-ba proposta ne’e.
“Ha’u hanesan Prezidente Komisaun G sei enkoraja deputadu hotu-hotu atu tau-matan ba halerik ne’ebé mai hosi Klibur Instituisaun Superiór Privadu Timor-Leste (KIESP-TL) ne’ebé aprezenta rasik hosi magnífiku reitór sira,” dehan Prezidente Komisaun G ne’e.
Jornalista : Evaristo Soares Martins
Editór : Cancio Ximenes
