iklan

NASIONÁL, COVALIMA, COVID-19, HEADLINE, MUNISÍPIU, SAÚDE

Governu Husu Profisionál Saúde Servisu Labele Garante De’it ba Subsídiu

Governu Husu Profisionál Saúde Servisu Labele Garante De’it ba Subsídiu

Vise Ministru Saúde, Bonifácio 'Maucoli' dos Reis. Imajen Tatoli/Antonio Goncalves.

DILI, 09 jullu 2020 (TATOLI)-Vise Ministru Saúde, Bonifácio Maucoli dos Reis, husu ba profisionál saúde sira iha Munisípiu Covalima atu servisu ho profesionál ba prevene no kombate surtu COVID-19 la’ós halo servisu tanba garante de’it ba suplementu remuneratóriu ne’ebé maka Governu oferese ona.

“Ha’u husu ba profisionál saúde sira  servisu ho profisionál nafatin tanba maske iha ita rai viruscorona ne’e laiha ona maibé ita-nia nasaun viziñu Indonézia oras ne’e kazu COVID-19 sei aas tanba ne’e serbisu hatudu nafatin imi-nia profisionál,” dehan, Bonifácio Maucoli dos Reis, durante halo observasaun ba fatin kuarentena iha Covalima, tersa (07/07).

Governu seidauk iha planu atu fó tan subsídiu ba profisionál saúde sira durante servisu normál. Maibé Nia dehan bainhira iha kazu COVID-19 foun maka Governu sei tetu atu kontinua implementa subsídiu ka lae.

Entretantu, Governu aprova subsídiu ho kategoria tolu ba ekipa servisu prevensaun COVID-19 hanesan liña oin liliu iha fatin izolamentu simu $ 25.00,  kuarentena $ 20 no mós servisu administrativa ka sira ne’ebé apoiu maibé laiha kontaktu direta ho valór $ 15.

“Nu’udár  profisionál saúde antes ita hala’o servisu ita idaidak halo juramentu  tiha ona ba kna’ar ne’ebé ita lori ida ne’e mak ita tenke kumpre, tanba ne’e ita  bele ejize ita-nia direitu maibé ita-nia devér ita tenke hala’o ho responsabilidade,”dehan Maucoli.

Ikusliu, Bonifácio hato’o parabens ba médiku sira liña oin ka front line ninian, no ema hotuhotu ninia tanba fó ona kontribuisaun hodi prevene transmisaun moras coronavirus iha Timor-Leste.

Jornalista : Felicidade Ximenes

Editór       : Agapito dos Santos

iklan
iklan

Leave a Reply

iklan
error: Content is protected !!