DILI, 08 jullu 2020 (TATOLI)-Sekretáriu Estadu Arte no Kultura (SEAK) tuir planu sei harii edifísiu Sentru Kultura iha área Aitarak-Laran Dili hodi prezerva no dezenvolve kultura Timor-Leste ninian.
Sekretáriu Estadu, Teofilo Caldas, hateten tuir loloos Ministériu Ensinu Superiór Siénsia no Kultura ho Sekretáriu Estadu Arte no Kultura uza edifísiu Arte Moris Comoro Dili sai fatin Akadémiku Arte Indústria Kultura no Sentru Kultura, maibé Primeiru-Ministru propoin atu entrega ba Konsellu Veteranus hodi uza iha futuru.
Notísia Relevante :Konsidera Luta Veteranus, Governu Entrega Edifísiu Arte Moris
Governante dehan, nia parte observa ona rai iha área Aitarak-Laran ho ninia espasu luan atu harii edifísiu refere, rai ne’e metade Governu entrega ona ba UNESCO no metade ba SEAK.
“Ami nia dezeñu no BOQ (Bill of Quantity) Preparadu hotu ona hein de’it tempu atu instala maibé tanba rai ne’e (área Arte Moris) entrega fali ba Konsellu Veteranus, ami sei uza fali terenu ne’ebé iha Aitarak-Laran,” dehan Teofilo ba TATOLI, iha ninia servisu fatin Praia dos Coqeiros Dili, kuarta horiseik.
Notísia Relevante :Arte Moris Prontu Koopera ho Governu Entrega Edifísiu ba CCLN, Maski Hasoru Difikuldade
SEAK husu ona ba Ministériu Justisa no Diresaun Terras no Propriedade atu legaliza rai iha área Aitarak-Laran nune’e bele prevee iha orsamentu ba kontrusaun ne’e iha proposta OGE 2021.
Notísia Relevante :Governu Sei La Abandona Arte Moris
“Agora kona-ba propriedade iha Arte Moris nian ne’ebé Ministériu Justisa ho Terras atribui ona ba SEAK ne’e la duvida tanba medida rai ne’e klaru purvolta metru 21.770 kuadradu ida ne’e mós bele uza ba edifísiu tolu ne’ebé mak mensiona,”katak Nia.
Jornalista : Tomé Amado
Editór : Agapito dos Santos
